Дар шаҳри Норак Мусобиқаи футбол миёни дастаҳои духтарона баргузор гардид

Душанбе, 21.07.2016. /АМИТ «Ховар»/.  Аз 15 то 19 июли соли равон дар шаҳри Норак Мусобиқаи ҷумҳуриявӣ оид ба футбол байни дастаҳои духтарона баргузор гардид. Мусобиқа, ки ба 25-солагии Истиқлолияти давлатии Ҷумҳурии Тоҷикистон бахшида шуда буд, бо ширкати беҳтарин дастаҳои футболбоздухтарон аз манотиқи мухталифи кишвар сурат гирифт.
Дар мусобиқа  дастаҳои «Хатлон-1», «Хатлон-2», «Душанбе», «Ноҳияҳои тобеи марказ» ва дастаи «Барқ»-и шаҳри Норак иштирок намуданд. Дар натиҷа, футболбоздухтарони дастаи «Душанбе» бо 8 хол сазовори ҷои аввал гашта, дастаи «Хатлон-1» бо 8 имтиёз  мақоми дуюмро ишғол намуд. Футболбозони дастаи «Хатлон-2» бо 6 имтиёз ҷойи сеюмро соҳиб шуданд.
Дар охир ғолибон бо медалу диплом ва туҳфаҳои хотиравии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва ФФТ қадрдонӣ шуданд.