Дилшод Назаров – парчамбардори Тоҷикистон дар маросими ифтитоҳи Олимпиадаи Рио-2016!

Июль 16, 2016 12:53

Душанбе, 16.07.2016. /АМИТ «Ховар»/. Дилшод Назаров, варзишгари машҳури тоҷик, парчамбардори Тоҷикистон дар маросими ифтитоҳи Бозиҳои XXXI тобистонаи олимпӣ дар Рио-де-Жанейрои Бразилия интихоб шуд.

Тавре аз Хадамоти матбуотии КМО Тоҷикистон ба АМИТ «Ховар» хабар доданд, ин тасмим дар ҷаласаи Ассамблеяи XV генералии Кумитаи миллии олимпии Тоҷикистон (КМОТ), ки имрӯз, 16-уми июл дар шаҳри Душанбе, дар маҷлисгоҳи КМОТ барпо гардид, гирифта шуд.

Ёдовар мешавем, ки Дилшод Назаров аввалин варзишгари тоҷик аст, ки ба Бозиҳои тобистонаи олимпии соли 2016 дар Рио-де-Жанейрои Бразилия роҳхат гирифтааст. Ӯ моҳи майи соли гузашта дар мусобиқаи ҷаҳонии силсилаи Гран-при оид ба гурзандозӣ дар Ҷумҳурии Чех бо натиҷаи 79 метру 36 сантиметр мақоми дуввумро касб кард ва ба ҳаққи ширкат дар Бозиҳои олимпӣ дар Рио-де-Жанейро мушарраф шуд. Олимпиадаи навбатӣ барои Дилшод Назаров чорумин ба шумор меравад.

Бояд гуфт, ки пеш аз оғози кори ҷаласаи Ассамблеяи XV генералии КМОТ варзишгарон Муҳаммадмурод Абдураҳмонов (гуштии дзюдо) ва Анвар Юнусов (бокс) барои ба даст овардани роҳхатҳо ба Бозиҳои олимпии Рио-2016 бо ҷоизаи молии ҶДММ «Ғаюр”, сарпарасти кулли КМОТ, мукофотонида шуданд. Ҷоизаҳоро ба ҳарду раҳбари ин ҷамъият Акбар Ғуломов, ки ҳамзамон ноиби президенти КМО ҶТ мебошад, супурд.

Дар ҷаласаи Ассамблеяи XV генералии Кумитаи миллии олимпии Тоҷикистон фаъолияти КМОТ дар давраи соли 2015 ва нимаи аввали соли 2016  натиҷагирӣ шуд.

Дар ин бора котиби генералии Кумитаи миллии олимпии Тоҷикистон Баҳрулло Раҷабалиев  ҳисобот дод. Вай гуфт, ки то имрӯз ҳафт варзишгари Тоҷикистон ба ҳаққи ширкат дар Олимпиадаи Рио-2016 мушарраф шудаанд.

«Ба ҷуз гурзандоз Дилшод Назаров, паҳлавонони тоҷик Комроншоҳи Устопириён ва Муҳаммадмурод Абдураҳмонов дар риштаи дзюдо, муштзан Анвар Юнусов, шиноварон Анастасия Тюрина ва Олим Қурбонов, даванда Кристина Пронженко дар Олимпиадаи Рио-2016 Тоҷикистонро муаррифӣ мекунанд”, — иброз дошт Баҳрулло Раҷабалиев.

Июль 16, 2016 12:53

Хабарҳои дигари ин бахш

Барои дарёфти «Ҷоми Раиси шаҳри Душанбе» Мусобиқаи байналмилалии гӯштингирӣ баргузор мегардад
ҶОМИ ОСИЁ-2025. Дастаи мунтахаби наврасони Тоҷикистон (U-17) дар Ҷидда тамринҳои навбатӣ баргузор намуд
Дар Чемпионати Осиё оид ба ҷудо Тоҷикистонро 13 варзишгар муаррифӣ менамояд
Ғолибони шоҳҷоизаҳои Мусобиқаи гӯштини миллӣ дар ноҳияи Темурмалик муайян шуданд
Душанбе мизбони Форуми Шурои олимпии Осиё ва ҳамбастагии олимпӣ мегардад
Дар Душанбе Ҷоми ҷаҳон оид ба велосипедронии кӯҳӣ баргузор мегардад
Абдулло Давлатов бозиҳои қисми ниҳоии Ҷоми Осиё-2025-ро доварӣ менамояд
Дастаи мунтахаби наврасони Тоҷикистон (U-17) панҷ бозии санҷишӣ анҷом дод
ЧЕМПИОНАТИ ТОҶИКИСТОН. Бозиҳои даври сеюми дастаҳои Лигаи олӣ оид ба футбол оғоз мегарданд
Рақибони дастаи мунтахаби занонаи Тоҷикистон оид ба футбол дар марҳилаи интихобии Ҷоми Осиё-2026 муайян шуданд
Ғолибони Мусобиқаи байналмилалии гӯштингирӣ дар шаҳри Истаравшан муайян шуданд
Дар Қалъаи Муғтеппаи шаҳри Истаравшан Мусобиқаи байналмилалии гӯштингирӣ оғоз ёфт