Донишкадаи давлатии санъати тасвирӣ ва дизайни Тоҷикистон аввалин муассисаи мустақили давлатӣ доир ба рассомӣ мебошад

Душанбе, 27.07.2016. /АМИТ «Ховар»/.  «Донишкадаи давлатии санъати тасвирӣ ва дизайни Тоҷикистон бинобар сабаби зарурати кадрӣ 3 нафар донишҷӯи курси 3-и ихтисоси санъатшиносиро ба шаҳри Санкт-Петербурги Федератсияи Русия барои омӯзишу мукаммалгардонии дониши худ ба таҷрибаомӯзӣ сафарбар  намуд»,- гуфта шуд имрӯз зимни нишасти хабарӣ дар Донишкадаи давлатии санъати тасвирӣ ва дизайни Тоҷикистон.
Ба иттилои роҳбарият, ҳадафи асосии ин иқдом дар ояндаи наздик барои донишкада омода намудани мутахассисони варзидаи соҳаи санъатшиносӣ буда, дар ин самт як қатор тадбирҳои судманд андешида шуданд.
Бояд зикр кард, ки Донишкадаи давлатии санъати тасвирӣ ва дизайни Тоҷикистон 30 марти соли 2013 таъсис ёфта, аввалин муассисаи мустақили давлатӣ доир ба рассомӣ ба ҳисоб меравад.