Усмоналӣ Усмонзода, вазири энергетика ва захираҳои оби ҶТ: «Неругоҳҳои барқи обии «Қайроқум» ва «Сарбанд» таҷдид мешаванд»

Душанбе, 27.07.2016. /АМИТ «Ховар»/.  Неругоҳи барқи обии «Қайроқум», ки яке аз неругоҳҳои куҳансолтарини Тоҷикистон ба шумор меравад, таҷдид мешавад. Барои ин неругоҳ аз ҳисоби  Бонки Аврупоии  таҷдид ва рушд ва Бонки сармоягузории Аврупо  70 млн. доллар маблағ ҷудо шудааст ва  баъд аз таъмиру барқарорсозии  2 агрегат ва трансформаторҳо  тавоногии неругоҳ аз 126 ба 148 мегаватт расонида мешавад.
Дар ин бора Усмоналӣ Усмонзода, вазири энергетика ва захираҳои оби Ҷумҳурии Тоҷикистон зимни нишасти матбуотӣ иттилоъ дод.
Усмоналӣ Усмонзода  ҳамчунин илова намуд, ки барои бозсозии неругоҳи «Сарбанд» аз ҷониби Бонки рушди Осиё 136 млн. доллар грант ҷудо  карда шудааст ва баъд аз интихоби пудратчӣ ва имзои шартнома то охири сол корҳои барқарорсозии он оғоз мегардад.