Китоби Ҳунарпешаи халқии Тоҷикистон Гулсара Абдуллоева ба табъ расид

Душанбе, 04.08.2016. /АМИТ «Ховар»/. «Ман модарам» -чунин ном дорад китоби тозаэҷоди Ҳунарпешаи халқии Тоҷикистон Гулсара Абдуллоева, ки чанде пеш нашрияи «Нашри мубориз» ба табъ расонид.
Гулсара Абдуллоева дар асари мазкур бо ҳаяҷон ва меҳру муҳаббат ба хонанда солҳои сипаришудаи ҳаёт, ёддошт ва андешаҳояшро пеши назар овардааст.
«Ӯ дар фазои маънавии мамлакат, намоишномаву филмҳои ҳунарӣ, барномаҳои бадеии телевизионӣ панҷоҳ нақши муқаддаси «Модар»-ро офаридааст, ки ҳар кадоме дар мақоми хеш камназиру аз нигоҳи симо, ифода, чеҳра, садову нидо ба ҳам шабоҳат надоранд». Ин сатрҳо аз сарсухани нависанда ва драматург, доктори фахрии фалсафа дар соҳаи адабиёт Абдуғаффори Абдуҷаббор бар асари мазкур аст.
«Модар», «Падар», «Гитис»-сарчашмаи меҳру сафо», «Шиносоии тақдирсоз», «Агар нагӯям гуноҳ», «Устодони азизи мо», «Духтари нозпарварди кино», «Тааҷҷуби Расул Ғамзатов», «Ман модарам», «Модари модарон», «Устод Нурҷонов, саломат бошед», «Ман ҳамонам ки…», «Нидои модар» аз асарҳои ин китобанд,  ки хонандаро бо муаллиф боз ҳам наздиктар месозанд.