Фестивали «Атласу адраси Суғд-2016» доир мегардад

Душанбе, 03.09.2016 /АМИТ «Ховар»/. Ба муносибати 25-солагии Истиқлолияти давлатии Ҷумҳурии Тоҷикистон моҳи октябри соли равон Фестивали вилоятии «Атласу адраси Суғд-2016» баргузор мегардад.
Фестивал бо мақсади тарғибу ташвиқи либоси миллӣ, тарбияи зебоипарастӣ, баланд бардоштани мақому манзалати либоси миллӣ, тақвият ва густариш бахшидан ба истеҳсолу истифодаи анвои гуногуни либосу матоъҳои миллӣ ва рушди атласу адрасбофӣ гузаронида мешавад.
Фестивали вилоятии «Атласу адраси Суғд- 2016» аз рӯи бахшҳои «Беҳтарин либоси кӯдакона», «Беҳтарин либоси рӯзмарра», «Беҳтарин либоси расмӣ», «Беҳтарин либоси миллии қадима» ва «Беҳтарин либоси идона» гузаронида мешавад.
Барои барандаи Шоҳҷоизаи Фестивал 5 ҳазор сомонӣ ва барои дигар ғолибони озмун аз 2 то 3 ҳазор сомонӣ мукофотпулӣ дар назар дошта шудааст.