Ноҳияи Тоҷикобод ҳамсолу ҳампоя ва ҳамнафаси даврони соҳибистиқлолии Тоҷикистон аст

Тоҷикобод, 21.09.2016. /АМИТ «Ховар»/. Даврони соҳибистиқлолӣ ба ноҳияи Тоҷикобод бурди зиёд оварда, имрӯз симои ноҳия ба кулли дигаргун гардидааст. Пешравӣ ва дастовардҳои беназири мардуми ноҳия чун меҳнаткашони дигар манотиқи Тоҷикистон, бешубҳа, самараи Ваҳдат, муттаҳидиву якдилӣ ва Истиқлолияту озодист.
Ноҳияи Тоҷикобод бори дуюм соли 1991 ташкил ёфта, ҳамсолу ҳампоя ва ҳамнафас дар даврони соҳибистиқлолӣ бо Тоҷикистон аст.
Тоҷикобод дар ҳайати ноҳияҳои тобеи ҷумҳурӣ буда, дар қисмати шимолу шарқии он ҷойгир шудааст. Масоҳати ноҳия 734,4 киллометри муррабаъро ташкил намуда, аз ғарбу шимол ба ноҳияи Рашт, аз шарқ ба ноҳияи Лахш ва аз ҷануб ба ноҳияи Сангвор ҳамсарҳад мебошад. Ноҳия аз маркази ҷумҳурӣ- шаҳри Душанбе дар масофаи 240 км ҷойгир шудааст. Ба ҳудуди ноҳияи Тоҷикобод ҷамоатҳои Қалъаи лаби об, Нӯшор, Шогадоев, Ширинчашма ва Лангари шоҳ дохил мешаванд, ки аҳолияш 42 ҳазору 863 нафарро ташкил медиҳад.
Ҳаҷми маҷмӯи маҳсулоти дохилӣ соли 2015 — 123 млн. сомониро ташкил дод, ки нисбат ба соли 1992- 290 маротиба зиёд шудааст.
Буҷети ноҳия соли 2015 — 21,8 млн. сомониро ташкил дод, ки нисбат ба соли 1992 444 маротиба зиёд шудааст.
Маблағгузории соҳаи маориф дар соли 2015 нисбат ба соли 1992 290 маротиба ва нисбат ба соли 2006 43 маротиба зиёд шудааст. Дар ҳамин давраҳо маблағгузории соҳаи тандурустӣ мутаносибан 115 ва 6 маротиба зиёд шудааст.
Музди маоши миёнаи номиналии коргар мутобиқ ба маълумоти шуъбаи омори ноҳия соли 2015- 575 сомониро ташкил дода, нисбат ба соли 1992- 24,6 маротиба ва нафақаи миёна дар соли 2015 нисбат ба соли 1992 — 103 маротиба зиёд шудааст.