Баракатулло Икромов ва Аҷам Нуриддинов соҳиби медали тиллои мусобиқаи омодагӣ ба бозиҳои олимпии «Буэнос — Айрес 2018» гардиданд

Файзобод, 18.10.2016. /АМИТ «Ховар»/. Хонандагони мактаби варзишии ноҳияи Файзобод дар мусобиқаи интихобии омодагӣ ба бозиҳои олимпии наврасон «Буэнос — Айрес 2018» оид ба гӯштини дзюдо, ки дар шаҳри Ваҳдат доир гардид, сазовори ҷойҳои намоён гардиданд.
Тибқи иттилои директори мактаби варзишии ноҳияи Файзобод Икром Ғиёсов, дар натиҷаи омодагии ҷиддии муаллимону хонандагон 8 нафар хонандаи муассисаи мазкур дар мусобиқаи интихобии омодагӣ ба бозиҳои олимпии наврасон «Буэнос-Айрес 2018» сазовори ҷойҳои якум, дуюм ва сеюм шуданд.
Аз ин миён Баракатулло Икромов ва Аҷам Нуриддинов сазовори медали тилло гардиданд.