Муассисаи нигоҳдории роҳҳои мошингарди ноҳияи Б. Ғафуров ба сармо омода аст

Душанбе, 22.11.2016. /АМИТ «Ховар»/. Аз тарафи Муассисаи давлатии нигоҳдории роҳҳои мошингарди ноҳияи Бобоҷон Ғафуров соли равон 15 км роҳҳои марказ ва байни ҷамоати деҳот мумфарши асосӣ ва зиёда аз 200 км роҳҳо таъмири ҷорӣ карда шуданд. Ин корҳо асосан аз ҳисоби буҷети давлатӣ, саҳми ташкилоту идораҳо ва соҳибкорон амалӣ шудаанд.
Тавре аз Муассисаи давлатии нигоҳдории роҳҳои мошингарди ноҳияи Бобоҷон Ғафуров иттилоъ доданд, бар замми иҷро шудани ҳаҷми корҳои навсозии роҳ дар ин муддат 80 нафар кормандону мутахассисони муассиса барои дар ҳолати хуб нигоҳ доштани роҳҳою таъмини бехатарии ҳаракати нақлиёт дар давраи зимистон омодагӣ гирифтаанд.
Мутахассисони роҳдории ноҳия 15 адад техникаи роҳдориро таъмир намуда, 2000 литр сӯзишворӣ, 2,5 тонна ангишт, 4,0 метри кубӣ ҳезум ва миқдори зарурии маводи зидди лағжиш захира намудаанд.
Дар тавозуни муассиса 428,1 км роҳҳои дорои аҳамияти ҷумҳуриявӣ ва маҳаллӣ мавҷуданд. Захира барои давраи зимистон имконият медиҳад, ки дар ҳолати зарурӣ барои таъмини мунтазами ҳаракати нақлиёт аз он истифода карда шавад.