Футбол: «Панҷшер» барои ғалаба дар Лигаи якум бо медалҳои тилло сарфароз гардид

ДУШАНБЕ, 29.12.2016 /АМИТ «Ховар»/. Дастаи «Панҷшер»-и ноҳияи Ҷалолиддини Балхӣ дирӯз барои ғалабаи шоёнаш дар чемпионати мамлакат байни дастаҳои Лигаи якум бо ҷом ва медалҳои тилло сарфароз гардонида шуд. Дар ин бора сомонаи ФФТ иттилоъ медиҳад.
Дастаи «Панҷшер» дар мавсими соли 2016 аз 24 вохӯрӣ дар 19- тоаш ғалаба карда, ду бозиро мусовӣ ва се бозии дигарро бо бохт ҷамъбаст кард. Даста бо касби 59 имтиёз соҳиби ҷои аввал гардид. Дар ҷараёни супоридани медалҳо ва Ҷоми мусобиқот беҳтарин бозингарон аз ҷониби роҳбарияти дастаи «Панҷшер» бо туҳфаҳо сарфароз гардонида шуданд.
Аз ҷониби ФФТ медалҳоро директори генералии Лигаи миллии футбол Алишер Урунов ва раиси Федератсияи футболи вилояти Хатлон (ФФВХ) Исроил Шарифов тақдим карданд.
Ёдрас мешавем, ки ҳамлагари дастаи «Панҷшер» Абдухалил Боронов ҳафтаи гузашта аз ҷониби ФФТ барандаи унвони беҳтарин бозингари Лигаи якум эълон шуда буд.
«Панҷшер» соли оянда ба қатори дастаҳое, ки дар Лигаи олӣ ҳунарнамоӣ мекунанд, шомил шуд. Даста дар сурати ба талаботи нави ФФТ ҷавобгӯ шудан дар Лигаи олӣ дар мавсими футболи соли 2017 иштирок мекунад.