«Худойназар Асозода ва тозаандешӣ дар адабиёти тоҷик»-маҳфили ёдбуди донишманди маъруф

ДУШАНБЕ, 26.12.2016. /АМИТ «Ховар»/. Дирӯз дар толори хониши ба номи Шарифҷон Ҳусейнзодаи Донишгоҳи миллии Тоҷикистон бо ширкати ҷамъе аз донишмандон, устодони Донишгоҳ, адибони маъруф ва донишҷӯён маҳфили илмӣ-адабии «Худойназар Асозода ва тозаандешӣ дар адабиёти тоҷик» баргузор шуд. Дар ин бора аз ДМТ хабар доданд.
Маҳфил ба ифтихори 75-умин солгарди донишманди маъруф, профессор Худойназар Асозода бахшида шуда буд. «Агар ӯ дар ҳаёт мебуд, ҳафтодупанҷсола мешуд. Ҷамъомади дирӯза ёде буд аз шогирдон, ҳамкорон, дӯстон ва наздикони устод Асозода. Худойназар Асозода аз ҷумлаи пуркортарин олимони кишвар буд, ки аз худ мероси гаронбаҳо боқӣ гузошт. Вале бузургтарин мероси ӯ ёдҳои хушест, ки имрӯз баъди даргузашташ шогирдону ҳамкоронаш нақл мекунанд»,- зикр шуд дар маҳфил.
Бояд гуфт, ки Худойназар Асозода аз чеҳраҳои мондагори илму фарҳанги кишвар аст. Даҳҳо таълифоташ имрӯз барҳақ барои донишомӯзон китоби дарсӣ гаштаанд. Бахусус, таҳлилу пажӯҳишҳои фарогираш дар бораи зиндагинома ва осори поягузори адабиёти навини тоҷик, Қаҳрамони Тоҷикистон Садриддин Айнӣ хеле арзишманд ва муфиданд.