Тевес ба дастаи «Шанхай Шенхуа»-и Чин гузашт
![](https://khovar.tj/wp-content/uploads/2016/12/teves.jpg)
ДУШАНБЕ, 29.12.2016 /АМИТ «Ховар»/. Ҳамлагари дастаи мунтахаби Аргентина ва КФ «Бока Хуниорс» Карлос Тевеси 32-сола ба дастаи «Шанхай Шенхуа» гузашт. Дар ин бора «TransferMarkt China» хабар медиҳад.
Бино ба иттилои рӯзномаи «Daily Mail» маоши Тевес дар клуби наваш дар як ҳафта 615 ҳазор фунт стерлингро (763,5 ҳазор доллар) ташкил медиҳад, ки ин маоши аз ҳама баландтарин дар ҷаҳони футбол мебошад.
Тевес дастпарвари клуби футболи «Бока Хуниорс» буда, соли 2015 баъди ҳунарнамоиаш дар клубҳои Аврупо («Вест Хэм», «Манчестер Юнайтед», «Манчестер Сити» ва «Ювентус») аз нав ба ин даста баргашт. Аз соли 2004 дар ҳайати дастаи мунтахаби Аргентина ҳунарнамоӣ дорад. Дар 76 бозии дастаи мунтахаб иштирок карда, ба дарвозаи ҳарифон 13 тӯб задааст. Тевес дар ҳайати дастаи мунтахаби кишвараш соли 2004 чемпиони олимпӣ (Афина), сазовори медалҳои нуқраи Ҷоми конфедератсия (2005) ва се маротиба соҳиби медалҳои нуқраи Ҷоми Амрико (2005, 2007, 2015) гаштааст.