47 нафар занон дар Сарбанд «хона ба хона» Паём мерасонанд

ДУШАНБЕ, 6.01.2017 /АМИТ «Ховар»/. Дар шаҳри Сарбанд аз ҳисоби 47 нафар занони фаъол 11 гурӯҳи корӣ таъсис дода шудааст, ки ҷиҳати ба мардум расонидани муҳтавои Паёми навбатии Сарвари давлат, риояи талаботи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи Танзими анъана ва ҷашну маросимҳо дар Ҷумҳурии Тоҷикистон» ва дигар санадҳои меъёрии ҳуқуқӣ дар маҳалҳо фаъолияти худро идома медиҳанд.
Дар ин бора ба хабарнигори АМИТ «Ховар» аз мақомоти иҷроияи ҳокимияти давлатии вилояти Хатлон хабар доданд.
Ба иттилои манбаъ, зимни вохӯрие, ки муовини раиси шаҳри Сарбанд Наргис Қурбонова бо як гурӯҳ фаъолзанони шаҳр доир намуд, зикр гардид, ки ин амал барои таъсирбахш ва самаранок намудани фаъолияти гурӯҳҳо, ки асосан бо усули «Хона ба хона» ба роҳ монда мешаванд, огаҳӣ ёфтан аз зиндагиву рӯзгори ҳар як сокини шаҳр, пешгирии наврасону ҷавонон аз амалҳои номатлуб, аз қабили ҷинояткорӣ, беҳудагардӣ, нашъамандӣ, бегонапарастӣ ва баланд бардоштани маданияти шаҳрдории сокинон заминаи хубу самарабахш мегузорад.