Бозингари КФ «Зенит» даъвати «Ювентус»-ро рад карда, ба Чин рафт

ДУШАНБЕ, 3.01.2016 /АМИТ «Ховар»/. Нимҳимоятгари белгиягии клуби футболи «Зенит»-и Санкт-Петербург Аксел Витсел даъвати дастаи «Ювентус»-и Италияро барои гузаштан ба ин тим напазируфта, КФ «Тянтсзин Тсюантсзян»-и Чинро интихоб кард. Барои ин раддия Витсел аз дастаи «Ювентус» узр хостааст, хабар медиҳад «Football Italia» дар такя ба маводи рӯзномаи «Tuttosport».
«Интихоб барои ман ниҳоят душвор омад, зерро топ клуби Аврупо -«Ювентус» маро даъват карда буд. Аз тарафи дигар барои оилаам шартҳои клуби дуюм маъқул афтод», -гуфтааст Аксел Витсел. Расонаҳои хабарии Италия иттилоъ медиҳанд, ки КФ «Тянтсзин Тсюантсзян»-и Чин барои харидории Аксел Витсел ба «Зенит» 20 миллион евро пардохт карда, маоши бозингарро 18 миллион евро дар як сол муқаррар кардааст. Дастаи дигаре, ки мехост нимҳимоятгари «Зенит»-ро дар ҳайаташ бинад, ин КФ «Шанхай СИПГ» ба шумор мерафт, ки барои Витсел 25 миллион евро пешниҳод карда буд.
22 декабр хабаре ба нашр расид, ки гуфтугӯи клубҳои «Ювентус» ва «Зенит» дар масъалаи Аксел Витсел ба мушкилӣ рӯ ба рӯ гардид ва «Ювентус» умед дорад тобистон Витселро бе ягон маблағ ҳамчун бозингари озод ба ҳайати дастааш дохил кунад.
Зенит ин масъаларо бо роҳи худ ҳал кард.