Иттиҳодияҳои динии ҷумҳурӣ ба ятимону маъюбон ва шахсони бепарастор беш аз 2 миллион сомонӣ кумакҳои пулию молӣ расониданд

ДУШАНБЕ, 10.01.2017/АМИТ «Ховар»/. Имрӯз дар Маркази матбуоти АМИТ «Ховар» нишасти матбуотии Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон баргузор гардид. Дар ин бора хабанигори АМИТ «Ховар» хабар медиҳад.
«Тибқи маълумоти мақомоти иҷроияи ҳокимияти давлатии шаҳру ноҳияҳои ҷумҳурӣ иттиҳодияҳои динии ҷумҳурӣ ба ятимону маъюбон, шахсони бепарастор ва оилаҳои камбизоат ба муносибати иди байналмилалии Наврўз, Рӯзи Ваҳдати миллӣ, иди Рамазон ва иди саиди Қурбон ба маблағи 2 миллиону 686 ҳазору 196 сомонӣ кумакҳои пулию молӣ расониданд»,- зикр кард Ҷумъахон Ғиёсов, муовини якуми Раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон.
Мавсуф оид ба робитаҳои байналмилалӣ ва ташкили ҳаҷи Кумита гуфт: «Сафарбаркунии ҳоҷиёни Тоҷикистон аз ҷониби ҶДММ «Ширкати ҳавопаймоии Сомон Эйр», ҶСК Тоҷик Эйр ва ширкати ҳавопаймоии «Флайнюс»-и Шоҳигарии Арабистони Саудӣ тавассути 27 хатсайр аз фурудгоҳҳои шаҳрҳои Душанбе ва Хуҷанд ба шаҳрҳои Ҷидда ва Мадина 21 августи соли 2016 шурӯъ гардида, 5 сентябри соли 2016 ба анҷом расид. Бозгашти зоирини тоҷик ба Ватан 18 сентябр оғоз ёфта, 6 октябр анҷом ёфт».