Норозигии мухлисон аз нишони нави КФ «Ювентус»

ДУШАНБЕ, 18.01.2017/АМИТ «Ховар»/. Мухлисони КФ «Ювентус» нисбат ба нишони (логотип) нави клуб, ки аз моҳи июли соли равон дар амал татбиқ мегардад, норозигии худро баён карданд. Ба ақидаи онҳо нишони кӯҳна нисбат ба нав хубу дилработар аст. Дар ин бора «Лента ру» хабар медиҳад.
16 январ «Ювентус» дар Музеи миллии илм ва технологияи ба номи Леонардо да Винчии шаҳри Милан расман нишони худро муаррифӣ кард. Дар нишон ду хати сафед дар манзари сиёҳ ҳарфи J-ро таҷассум карда, дар болояшон «Juventus» навишта шудааст. Рӯзноманигор Нима Тавалли дар Twitter хабаре нашр кардааст, ки барои ин нишон КФ «Ювентус» 200 000 евро (214,2 ҳазор доллар) сарф кардааст.