Омӯзгорону донишҷӯён тавассути хатсайр ба саёҳат мебароянд

ДУШАНБЕ, 27.01.2017. /АМИТ «Ховар»/. 27 январ 182 нафар омӯзгорону донишҷӯёни Донишкадаи молия ва иқтисоди Тоҷикистон вобаста ба ифтитоҳи роҳи оҳани Душанбе- Қӯрғонтеппа- Кӯлоб тавассути хатсайр ба роҳ мебароянд.
Тавре ноиби ректор оид ба тарбияи донишкадаи мазкур Зулфия Ахмедова иттилоъ дод, сафари саёҳатӣ дар доираи таътили зимистона ва арафаи таҷлили иди Наврӯз тавассути хатсайри Душанбе- Қӯрғонтеппа- Кӯлоб ба роҳ монда шудааст.
Ба иттилои манбаъ, омӯзгорону донишҷӯён аввал аз ҶДММ «Хуаксин Ғаюр Семент»-и ноҳияи Ёвон дидан намуда, баъд ба Минтақаи озоди иқтисодии Данғара мераванд. Баъд аз боздид аз минтақаи озод гурӯҳи устодону донишҷӯёни донишкада ба шаҳри Кӯлоб сафар менамояд.
28 январ дар шаҳри Кӯлоб дар якҷоягӣ бо донишҷӯёни Донишгоҳи давлатии Кӯлоб форуми ҷавонон баргузор мешавад.