«Шоҳин Асмоӣ» тайёриро ба вохӯрӣ бо «Ҳосилот» идома медиҳад

ДУШАНБЕ, 25.01.2017/АМИТ «Ховар»/. Чемпиони Афғонистон оид ба футбол дастаи «Шоҳин Асмоӣ» тайёрии худро барои бозии аввали плей-оффи Ҷоми Конфедератсияии футболи Осиё бо дастаи «Ҳосилот»-и Фархор идома медиҳад. Футболбозони ин даста таҳти роҳбарии Боир Эгамбердиев ва ёвари ӯ Муҷтабо Файз аз ҳафтаи гузашта ба машқҳо шурӯъ карданд.
Муҷтабо Файз дар суҳбат ба «afghanpremierleague.com» гуфтааст: «Бо рӯҳияе, ки тими мо дорад, сайъ мекунем бо нишон додани як бозии ҳадафманд ва шурӯи хуб дар Ҷоми Конфедератсияи футболи Осиё -2017 қадам занем. Бозингарони мо ҳамарӯза бо тамриноти махсус дар варзишгоҳи Федератсияи футболи Афғонистон фаро гирифта шудаанд. Ҳамаи бозингарон дар машқҳо ҳузур доранд. «Шоҳин Асмоӣ» ҳамеша барои пирӯзӣ мубориза мебарад».
Чемпиони Афғонистон «Шоҳин Асмоӣ» дар ду бозии санҷишӣ тавонистааст ҳарифони худро шикаст дода, бозии хуб нишон диҳад.
Ёдрас мешавем, ки бозии рафту баргашти «Шоҳин Асмоӣ» бо «Ҳосилот»-и Фархор 31 январ ва 7 феврал дар Варзишгоҳи марказии ҷумҳуриявии шаҳри Душанбе гузаронида мешаванд.