«Арўси наврўзӣ» ва «Моҳпайкари Наврўз» дар арафаи ҷашни Наврўз ҷамъбаст мегарданд

ДУШАНБЕ, 28.02.2017 /АМИТ «Ховар»/. Бо мақсади дар сатҳи баланд таҷлил намудани ҷашни Наврўзи байналмилалӣ, иҷрои Нақшаи чорабиниҳои Ҳукумати Ҷумҳурии Тоҷикистон оид ба омодагӣ ва баргузории ҷашни Наврўзи байналмилалӣ дар шаҳри Турсунзода (21-22 марти соли 2017) аз ҷониби Вазорати маориф ва илми Ҷумҳурии Тоҷикистон Озмуни ҷумҳуриявии «Арўси наврўзӣ» ва Фестивали либосҳои миллӣ таҳти унвони «Моҳпайкари Наврўз» байни донишҷўёни муассисаҳои таҳсилоти миёна ва олии касбӣ роҳандозӣ гардид.
Тавре ки аз хадамоти матбуоти вазорат хабар доданд, мутобиқи тартиби баргузорӣ даври аввали озмунҳо имрўзҳо дар муассисаҳои таҳсилоти миёна ва олии касбии кишвар оғоз гардидааст ва дар арафаи таҷлили ҷашни байналмилалии Наврўз ҷамъбаст мегардад.
Барномаҳо дар ҳамкорӣ бо Кумитаи кор бо занон ва оилаи назди Ҳукумати Ҷумҳурии Тоҷикистон роҳандозӣ гардида, мақсад аз роҳандозии он дар рӯҳияи масъулиятшиносӣ, ифтихор аз фарҳангу либоси миллии худ ва ҳисси худогоҳиву худшиносӣ тарбия намудан, заминагузорӣ барои бунёди фардои оилаҳои солим, пешгирӣ ва мубориза бар зидди ҳама гуна рафторҳои номатлуб, хушунату зўровариҳои рўҳиву ҷисмонӣ, рушди маънавиёти фарҳангию сиёсӣ ва маърифатию ҳукуқии ҷавондухтарон дар самти созандагиву бунёдкорӣ мебошад.