Баргузории «Озмуни суфраи наврӯзӣ» дар ноҳияҳои ВМКБ

ДУШАНБЕ, 17.02.2017 /АМИТ «Ховар»/. Бо ташаббуси шуъбаи кор бо занон ва оилаи Мақомоти иҷроияи ҳокимияти давлатии ВМКБ оид ба омодагӣ ба баргузории ҷашни Наврӯзи байналмилалӣ мусобиқаи телевизионии «Ороиши суфраи наврӯзӣ» байни бонувони вилоят ҷараён дорад.
Чунин озмун байни бонувони маҳаллаи Фурудгоҳ ва Дашти болои шаҳри Хоруғ бо иштироки фаъолонаи занони маҳаллаҳои мазкур доир гардид.
Мақсади озмун баланд бардоштани маърифати оиладории занону духтарон, ҳунармандони соҳибистеъдод ва нигоҳ доштани анъанаи тайёр намудани хӯрокҳои миллӣ мебошад.
Ғолибони озмун бо туҳфаҳои хотиравии мақомоти иҷроияи ҳокимияти давлатии шаҳри Хоруғ қадрдонӣ гардиданд. «Озмуни суфраи наврӯзӣ» дар дигар ноҳияҳои ВМКБ низ идома дорад.