Баррасии омодагии пеш аз сафари муҳоҷирони меҳнатӣ дар шаҳри Исфара

ДУШАНБЕ, 09.02.2017. /АМИТ «Ховар»/. Дар вилояти Суғд тадбирҳои муштараки маърифатии Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилоят ва Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Хуҷанд ва филиали ташкилоти ҷамъиятии «Марказ оид ба ҳуқуқҳои инсон» оғоз гардиданд. Вохӯрии нахустин дар ҷамоати деҳоти Хонободи шаҳри Исфара баргузор шуд, ки дар он намояндагони табақаҳои гуногуни аҳолӣ, аз ҷумла муҳоҷирони меҳнатӣ иштирок намуданд.
Дар вохӯрӣ бештар ба муҳимтарин нуктаҳои Паёми Сарвари кишвар ба Маҷлиси Олӣ, тағйироту иловаҳо ба санадҳои меъёрию ҳуқуқии Федератсияи Россия роҷеъ ба муҳоҷирати меҳнатӣ ва пешгирии шомилшавии ҷавонон ба ҳизбу ҳаракатҳои ифротгаро диққат дода шуд.