Дар шаҳри Хуҷанд ҳар чоршанбе намунаҳои маҳсулоти ҳунарҳои миллӣ ба намоиш гузошта мешаванд

ДУШАНБЕ, 02.02.2017 /АМИТ Ховар/. Дар Боғи фарҳангӣ-фароғатии ба номи Камоли Хуҷандии вилояти Суғд намунаҳои маҳсулоти ҳунарҳои миллӣ ва ашёҳои таърихӣ ба намоиш гузошта шуд. Дар ин бора аз хадамоти мабуоти вилояти Суғд хабар доданд.
Намоишгоҳи маҳсулоти ҳунарҳои миллӣ бо мақсади рушд ва эҳёи анъанаҳои мардумӣ бо ибтикори маъмурияти Муассисаи давлатии Маҷмааи фарҳангию таърихии «Қалъаи Хуҷанд» ба роҳ монда шуд.
Ба иттилои манбаъ, минбаъд ҳар ҳафта рӯзи чоршанбе намоиш ва фурӯши намунаҳои маҳсулоти ҳунарҳои миллӣ ва ашёҳои таърихӣ доир мешавад.
Маҷмааи фарҳангию таърихии «Қалъаи Хуҷанд» мавзеи сайёҳӣ ва макони истироҳату фароғати сокинону меҳмонони вилояти Суғд ба ҳисоб рафта, намоишгоҳи мазкур имконият медиҳад, ки меҳмонону сайёҳон ба маҳсулот ва ҳунарҳои мардумӣ дастрасӣ пайдо намоянд.