Гумонбарони ҷинояти дуздӣ ва куштор дастгир шуданд

ДУШАНБЕ, 24.02.2017. /АМИТ «Ховар». Зимни гузаронидани чорабиниҳои фаврӣ-ҷустуҷӯӣ аз ҷониби кормандони милитсияи Вазорати корҳои дохилии Ҷумҳурии Тоҷикистон якчанд ҷиноятҳо ошкор ва гумонбарони ҷиноят дастгир карда шуданд.
Тавре аз Вазорати корҳои дохилӣ хабар доданд, зимни гузаронидани чорабиниҳои фаврӣ-ҷустуҷӯӣ аз ҷониби кормандони милитсияи марди 41-солаи сокини деҳаи Янгибоғи ноҳияи Турсунзода бо гумони содир намудани ҷинояти куштор дастгир карда шуд. Гумонбаршуда 22 феврали соли 2017, тахминан соати 20:00 ба манзили истиқоматии ҷавони 19-солаи сокини деҳаи мазкур омада, аз сабаби муноқиша бо ӯ ва падари 41-солааш бо корди дар дасташ буда, якчанд маротиба ба аъзои бадани онҳо задааст. Дар натиҷа ҷавони 19-сола ҷароҳати вазнини ҷисмонӣ бардошта, дар беморхона ба ҳалокат расида, падараш дар беморхона бистарӣ гаштааст.
Инчунин ба Шуъбаи Вазорати корҳои дохилӣ-2 дар ноҳияи Сино марди 26-солаи сокини шаҳри Душанбе муроҷиат намудааст, ки шахси номаълум бо роҳи пинҳонӣ вориди хонаи истиқоматиаш шуда, аз он ҷо 3 ҳазору 900 сомониро дуздида, аз ҷойи ҳодиса ғайб задааст.
Зимни гузаронидани чорабиниҳои фаврӣ-ҷустуҷӯӣ аз тарафи кормандони милитсия бо гумони содир намудани ҷинояти дуздӣ марди 26-солаи сокини ноҳияи Восеъ, ки пеш бо моддаи 244 Кодекси ҷиноятии Ҷумҳурии Тоҷикистон суд шудааст, дастгир карда шуд. Ба ин монанд, зани 41-солаи сокини шаҳри Душанбе хабар додааст, ки 8 декабри соли соли 2016 шахси номаълум аз хонаи истиқоматиаш як адад компютери тамғаи «Самсунг»-ро бо тамоми таҷҳизот, ҷамъ ба маблағи 3 ҳазору 500 сомонӣ дуздида, аз ҷойи ҳодиса ғайб задааст.
Дар натиҷаи гузаронидани чорабиниҳои фаврӣ-ҷустуҷӯӣ гумонбари ҷинояти дуздӣ- марди 25-солаи сокини шаҳри Душанбе дастгир гардид. Далели шайъӣ гирифта шуд.
Аз рӯи ин ҳодисаҳо парвандаҳои ҷиноятӣ оғоз шуда, корҳои тафтишотӣ ҷараён доранд.