Маҳфили «Зебоӣ ва зебоипарастӣ» дар ноҳияи Мастчоҳ

ХУҶАНД, 18.02.2017. /АМИТ «Ховар»/.  «Зебоӣ ва зебоипарастӣ»- таҳти ин унвон дар мактаби миёнаи №16-и ноҳияи Мастчоҳ маҳфили фарҳангӣ доир гашт. Дар он аз ҷониби китобдорони китобхонаи мактаб китобу маҷаллаҳо дар мавзӯи «Занони Тоҷикистон», «Фирӯза», «Бонувони Тоҷикистон» ба намоиш гузошта шуда, аз тарафи хонандагон шеъру таронаҳо, саҳначаҳо, намоиши либосҳои миллӣ, омода намудани хӯриш ва рақсҳои ҷолиб пешкаши ҳозирин гардонида шуданд.

Тавре ба АМИТ «Ховар» аз шуъбаи ташкилии мақомоти иҷроияи ҳокимияти давлатии ноҳия иттилоъ доданд, маҳфил бо ибтикори бахши кор бо занон ва оила, кумитаи иҷроияи ноҳиявии Ҳизби Халқии Демократии Тоҷикистон ташкил гардид.

Намояндагони мақомоти маҳаллӣ, роҳбарият ва омӯзгорони мактаб оид ба мақому манзалати зан-модар дар ҷомеа ибрози ақида намуда, аз ҷумла баён доштанд, ки зебоӣ ба чашми мо нур ва ба дилҳо сурур мебахшад. Мо бояд на танҳо зебоӣ офарем, балки онро ҳифз кунем. Ҷавонон ҳамчун қишри ояндасози ин миллату ин давлат бояд нисбат ба табиат ва зебоиҳои нотакрори он бепарво набуда, барои нигоҳдошти он ғамхорӣ намоянд.