Намоиши ҳунарҳои миллӣ дар Ашт

ДУШАНБЕ, 17.02.2017. /АМИТ «Ховар»/. Дирӯз дар ҷамоати шаҳраки Шайдони ноҳияи Ашт намоиши ҳунарҳои миллӣ дар мисоли адрасу атласбофӣ, қолинбофӣ ва кандакорӣ доир гардида, ҳунармандони ҷамоат маҳсулоти худро намоиш доданд.
Тавре аз Мақомоти иҷроияи ҳокимияти давлатии ноҳияи Ашт хабар доданд, бо иштироки муовини раиси ноҳия Ҷамшед Маҳмудзода, сардори Раёсати Хадамоти муҳоҷират дар вилояти Суғд Зайнура Шарифӣ бо сокинон, раисони маҳаллаҳо, муҳоҷирони меҳнатӣ семинари машваратӣ гузаронида шуд. Ҷамшед Маҳмудзода зикр кард, ки имрӯз мақомоти ноҳия мекӯшад, то сокинонро бо ҷои кори доимӣ таъмин намояд.
Сардори Раёсати Хадамоти муҳоҷират дар вилояти Суғд Зайнура Шарифӣ оид ба тағйиру иловаҳо ба қонунгузории Федератсияи Руссия, бо кор таъмин намудани муҳоҷирони меҳнатӣ, пешгирии шомилшавии муҳоҷирон ба ҳар гуна ҳизбу ҳаракатҳо ва ҷалби занону духтарон ба ҳунаромӯзӣ ибрози андеша намуд.