Туркия ният дорад, ки дар наздиктарин фурсат дар Тоҷикистон бонки муштарак таъсис диҳад

Февраль 17, 2017 14:55

ДУШАНБЕ, 17.02.2017. /АМИТ «Ховар»/. Ҷумҳурии Туркия ният дорад, ки дар наздиктарин фурсат дар Ҷумҳурии Тоҷикистон Бонки муштарак таъсис диҳад. Ин ҳавасмандиро муовини Сарвазири Ҷумҳурии Туркия Юлдирим Туғрул Туркеш баъди мулоқот бо Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки имрӯз дар шаҳри Душанбе доир гардид, ба хабарнигорон изҳор намудааст.
Тавре ки хабарнигори АМИТ «Ховар» иттилоъ медиҳад, муовини Сарвазири Ҷумҳурии Туркия мулоқоти баргузоргардидаро самаранок арзёбӣ карда, зикр намудааст, ки иқтидор ва имконияти бузурги рушди ҳамкории тиҷоратию иқтисодии Туркия ва Тоҷикистон бояд ба пуррагӣ истифода шаванд.
Муовини Сарвазири Ҷумҳурии Туркия Юлдирим Туғрул Туркеш сабаби сафарашро ба Ҷумҳурии Тоҷикистон беҳтар намудани муносибатҳои иқтисодӣ ва вусъат бахшидани ҳамкории иқтисодии ҳарду кишвар маънидод намуда, иброз намуд, ки зимни мулоқот бо Президенти Ҷумҳурии Тоҷикистон муҳтарам Эмомалӣ Раҳмон ба истиснои муносибатҳои тиҷоратӣ, инчунин ба масъалаҳои амниятии ҳарду кишвар низ дахл намудаанд.
Бояд зикр намуд, ки Туркия дар даҳ соли охир дар самти ислоҳоти иқтисодиёт ва рушди саноат ба натиҷаҳои назаррас ноил гардида, ба содиркунандаи азими молу маҳсулот табдил ёфтааст. Муносибатҳои Тоҷикистону Туркия ба принсипҳои шарикии ҳамаҷониба ва мутақобилан судманд асос ёфтааст. Имрӯз дар ҳудуди Ҷумҳурии Тоҷикистон зиёда аз 60 ширкати туркӣ фаъолият дошта, ҳарду ҷониб ҳамкориро дар соҳаҳои сармоягузорӣ, саноат, энергетика, кишоварзӣ, нақлиёт, хизматрасонии фармоишӣ, бонкдорӣ, фарҳанг ва сайёҳӣ, танзими техникӣ, стандартизатсия, меҳнат, тандурустӣ ва маориф хуб ба роҳ мондаанд.

Февраль 17, 2017 14:55

Хабарҳои дигари ин бахш

Гармхонаҳои инноватсионии шаҳри Леваканд фаъолияти босамар доранд
Намояндаи Тоҷикистон дар ҷаласаи Комиссияи панаврупоии СҶТ оид ба иқлим ва тандурустӣ иштирок намуд
Шуруъ аз 16 июн байни шаҳрҳои Душанбе ва Пекин парвозҳои мустақим анҷом дода мешаванд
Дар Хуҷанд Форуми байналмилалии «Имкониятҳои тиҷоратӣ, сармоягузорӣ ва дурнамои ҳамкорӣ» баргузор гардид
Дар Душанбе вобаста ба таҳия намудани санади Гурӯҳбандии лоиҳаҳои «сабз» ҷаласаи Гуруҳи корӣ доир шуд
ЗАХИРА БАРОИ ЗИМИСТОН. Дар шароити хона чӣ тавр бояд хушкмева тайёр намуд?
Дар минтақаҳои ҷанубу ғарби Тоҷикистон корҳои омӯзишӣ-геофизикӣ оғоз гардид
То моҳи июн дар Тоҷикистон дар беш аз 182 ҳазор гектар пунбадона кишт карда шудааст
Дар Душанбе вобаста ба рушди мониторинги обҳои рӯизаминии Тоҷикистон ҳамоиш доир гардид
Муовини Сарвазир бо рафти кишти картошка дар Ҷамоати деҳоти Ҳиҷбораки ноҳияи Рашт шинос гардид
Сарвазири Ҷумҳурии Тоҷикистон Қоҳир Расулзода бо директори генералии «Роҳи оҳани Русия» Олег Белозёров мулоқот намуд
Ҷаласаи 82-юми Шурои маъмуриятҳои нақлиёти роҳҳои оҳани кишварҳои аъзои Иттиҳоди Давлатҳои Мустақил ба анҷом расид