Вазорати рушди иқтисод ва савдо: «Мақсади муҳокимаҳои ҷамъиятӣ пешниҳоди иттилоот ба аҳолӣ мебошад»

ДУШАНБЕ, 24.02.2017 /АМИТ «Ховар»/. Мақомоти иҷроияи ҳокимияти давлатии Шаҳритус, Кубодиён, Ҷайҳун, Дӯстӣ, Панҷ, Фархор, Ҳамадонӣ ва Шамсиддин Шоҳини вилояти Хатлон аз 28 то 7 марти соли равон таҳти ҳамоҳангсозии Вазорати рушди иқтисод ва савдои Ҷумҳурии Тоҷикистон ва якчанд лоиҳаи барномаҳои машваратӣ баргузор намудани муҳокимаҳои ҷамъиятии натиҷаҳои мониторинги татбиқи Барномаи рушди ноҳияҳоро ба нақша гирифтаанд.
Тавре аз Вазорати рушди иқтисод ва савдои Ҷумҳурии Тоҷикистон хабар доданд, мақсади асосии баргузории муҳокимаҳои ҷамъиятӣ пешниҳоди иттилоот ба аҳолӣ, намояндагони мақомоти ҳокимияти давлатӣ, ҷомеаи шаҳрвандӣ ва бахши хусусӣ оид ба раванди мониторинги татбиқи барномаҳои рушди иҷтимоию иқтисодии ноҳияҳои мазкур аст.
«Аз аввали татбиқи барномаҳои рушди ноҳияҳои таҷрибавӣ аз ҳисоби тамоми сарчашмаҳои банақшагирифташудаи маблағгузорӣ ба маблағи 220 миллион сомонӣ лоиҳаҳои афзалиятнок татбиқ шудаанд. Лоиҳаҳои татбиқгардида дар соҳаҳои кишоварзӣ, маориф, саноат, тандурустӣ ва ҳифзи иҷтимоии аҳолӣ, обтаъминкунӣ ва беҳдошт, ҳифзи муҳити зист ва пешгирии хатари ҳолатҳои фавқулода, беҳдошти замин ва обёрӣ, хоҷагии манзилию коммуналӣ, нақлиёт ва роҳ амалӣ гаштаанд»,- хабар дод манбаъ.