Боздошти мудири шуъбаи ташхиси судӣ-тиббии шаҳри Турсунзода бо гумони додани гувоҳии бардурӯғ

ДУШАНБЕ, 27.03.2017. /АМИТ «Ховар»/. Вазорати корҳои дохилии Ҷумҳурии Тоҷикистон аз боздошти мудири шуъбаи ташхиси судӣ-тиббии шаҳри Турсунзода барои додани гувоҳии бардурӯғ хабар медиҳад.
Тавре аз ин Вазорат хабар доданд, ҳангоми гузаронидани чорабиниҳои фаврӣ-ҷустуҷӯӣ марди 62-солаи сокини шаҳри Турсунзода, мудири шуъбаи ташхиси судӣ-тиббии шаҳри Турсунзода бо гумони додани гувоҳии бардурӯғ дастгир гардид. Гумонбаршуда ҳангоми гузаронидани ташхиси судӣ-тиббии ҷасади духтари 17-солаи сокини ҷамоати деҳоти Сешанбе, дидаву дониста, ки ӯ аз захмҳои халандаю буранда ба қатл расонида шудааст, хулосаи бардурӯғи ташхиси суддӣ-тиббӣ додааст, ки гӯё духтари ноболиғ даст ба худкушӣ зада, худро бо роҳи оташзанӣ ба ҳалокат расонидааст.
Нисбат ба далели мазкур парвандаи ҷиноятӣ оғоз шуда, корҳои тафтишотӣ давом доранд.