Иди аҷдодии Наврӯзро дар Вашингтон таҷлил намуданд

ДУШАНБЕ, 23.03.2017. /АМИТ «Ховар»/. Сафорати Ҷумҳурии Тоҷикистон дар ИМА бо дастгирии ҶСШК “Ориёнбонк” ва ҷамъиятҳои тоҷикони муқими ИМА бахшида ба ҷашни Наврӯз ва “Соли ҷавонон дар Тоҷикистон” чорабинии фарҳангӣ барпо намуд. Дар чорабинӣ намояндагони Котиботи давлатии ИМА, корпуси дипломатӣ ва ҳамватанони муқими ИМА ширкат варзиданд. Дар ин бора ба АМИТ «Ховар» аз ВКХ  ҶТ хабар доданд.
Гуфта мешавад, ки зимни чорабинӣ Сафири Ҷумҳурии Тоҷикистон Фарҳод Салим, Муовини ёвари котиби давлатӣ оид ба умури Осиёи Ҷанубӣ ва Марказӣ Даниел Розенблум ва намояндагони ҷамъиятҳои тоҷикони Ҳавзаи Колумбия, штатҳои Ню Йорк ва Калифорния суханронӣ намуда, ҳозиринро бо иди аҷдодии Наврӯз табрик намуданд.
Инчунин, дар чорабинӣ гӯшаи фарҳангӣ бо гулдӯзиҳои суннатии тоҷикӣ ва бо намоиши ҳафт сину ҳафт шин оро дода шуд.