Мавқеи обҳои Тоҷикистон дар инкишофи иқтисодиёти кишвар

ДУШАНБЕ, 13.03.2017 /АМИТ «Ховар»/. Пагоҳ дар Донишгоҳи давлатии омӯзгории Тоҷикистон ба номи Садриддин Айнӣ ба муносибати қабул гардидани ташаббуси Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба Даҳсолаи байналмилалии амал «Об барои рушди устувор», солҳои 2018-2028 дар мавзӯи «Роҳҳо ва самтҳои истифодаи самараноки захираи обҳои Тоҷикистон» конфронси илмӣ-амалии байналмилалӣ баргузор мегардад.
Тавре аз Донишгоҳи давлатии омӯзгории Тоҷикистон хабар доданд, дар конфронс олимон, муҳаққиқон, омӯзгорон, аспирантону унвонҷӯён, мутахассисони мактабҳои олии ҷумҳурӣ ва хориҷи кишвар иштирок намуда, оид ба мавзӯъҳои мавқеи обҳои Тоҷикистон дар инкишофи иқтисодиёти кишвар, аҳамияти гидроэнергетики дарёҳои Тоҷикистон, нақши пиряхҳои Тоҷикистон дар ташаккули захираҳои оби Осиёи Марказӣ ва масъалаҳои экологию ҳифзи захираҳои оби Тоҷикистон маърӯза хоҳанд кард.
Конфронси мазкур бо ташаббуси Вазорати маориф ва илми Тоҷикистон дар якҷоягӣ бо Донишгоҳи давлатии омӯзгории Тоҷикистон баргузор мегардад.