Ғолибони озмуни шаҳрии «Беҳтарин шеъру ҳикоя» муайян гардиданд

ХОРУҒ, 18.03.2017./ АМИТ «Ховар»/. Дар муассисаи давлатии Мактаби президентии шаҳри Хоруғ озмуни шаҳрии «Беҳтарин шеър ва ҳикоя» баргузор гардид, ки дар он намояндагони муассисаҳои таълимии шаҳр ширкат доштанд. Ба гуфтаи узви Иттифоқи нависандагони Тоҷикистон Алидоди Чароғабдол, «мақсади озмун ин нест, ки дар оянда ҳамаи кӯдакону наврасон бояд шоиру нависанда ба воя расанд, балки онҳо бояд ба дарки ҳар як мавзӯъ сарфаҳм рафта, фикри худро дар ҳар шакле ки набошад, бидуни иштибоҳ баён кунанд».
Шоира Руқияи Давроншо гуфт, ки «чанд соли охир бо сабаби коҳиш ёфтани сатҳи китобхонӣ дар миёни насли наврас савияи дониши хаттию шифоҳии онҳо низ хеле коста гаштааст. Аз ин рӯ Вазорати маориф ва илми ҷумҳурии Тоҷикистон ба хотири боло бурдани дониши хаттию шифоҳии хонандагони мактабҳои таҳсилоти умумӣ аз ин тадбир кор гирифт ва ин иқдоми хеле саривақтист. Умедворем, ки вазъи забондонии хонандагон дар оянда рӯ ба беҳбудӣ мениҳад. Озмуни мазкур дар рушди гуфтору навиштори кӯдакону наврасон низ кумак хоҳад кард. Онҳое, ки имрӯз дар озмун ширкат мекунанд, на ҳамаашон шоиру нависанда мешаванд, аммо боварӣ аст, ки дар оянда ҳар касберо интихоб кунанд ҳам, касе ба суханронию саводи хатии онҳо эрод нахоҳад гирифт».