Шоми муаррифии Тоҷикистон дар шаҳри Бонни Олмон

ДУШАНБЕ, 04.04. 2017. /АМИТ «Ховар» /. Дар пойтахти собиқи Олмон- шаҳри Бонн бо ташаббуси якҷояи Сафорати Тоҷикистон дар Олмон ва Ҷамъияти фарҳангии Колоквиум Ҳуманум бахшида ба 25-солагии барқарорсозии муносибатҳои дипломатӣ байни Тоҷикистон ва Олмон шоми муаррифии Тоҷикистон ва барномаи фарҳангӣ баргузор шуд.
Тавре аз Сафорати Тоҷикистон дар Олмон хабар доданд, роҳбари Ҷамъияти Колоквиум Ҳуманум Андреас Лёш аз рушди босуботи Тоҷикистон дар солҳои охир ситоиш намуда, амнияти кишварро барои минтақа хеле муҳим арзёбӣ кард.
Намояндаи Сафорати Тоҷикистон бо муаррифинома иборат аз мавзӯъҳои вазъи сиёсӣ, иқтисодӣ, фарҳангӣ ва фазои сармоягузории имрӯзи Тоҷикистон дар назди зиёда аз 200 нафар намояндаи доираҳои сиёсӣ, илмӣ, фарҳангӣ, иқтисодӣ ва шаҳрвандони шаҳри Бонн сухан гуфт. Доктор Людвиг Динклоҳ ва хонум Ута Микше хотираҳои сафари худро ба Тоҷикистон дар шакли китоб бо аксҳои ҷолиб муаррифӣ намуданд. Ҳамзамон ба ҳозирин маводи зиёди таблиғотӣ пешкаш гардиданд.
Дар бахши фарҳангии шоми муаррифии Тоҷикистон барномаи консертӣ бо иштироки овозхон Фахриддини Малик ва дуторнавоз Мадинахон Самес баргузор шуд, ки аз ҷониби ҳозирин бо хушнудӣ пазируфта шуд.