Вазири фарҳанг: «Муқовимат бо коррупсия савияи баланди маърифати ҳуқуқии шаҳрвандонро талаб мекунад»

ДУШАНБЕ, 19.04.2017 /АМИТ «Ховар»/. Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо кормандони Вазорати фарҳанги Ҷумҳурии Тоҷикистон вохӯрӣ анҷом доданд.
Тавре аз Вазорати мазкур хабар доданд, Шамсиддин Орумбекзода, Вазири фарҳанги Ҷумҳурии Тоҷикистон оид ба иҷрои нишондодҳои «Стратегияи муқовимат бо коррупсия дар Ҷумҳурии Тоҷикистон барои солҳои 2013-2020» чунин гуфт: «Дар самти пешгирии амалҳои дорои хислати коррупсионӣ баробари кормандони мақомоти ҳифзи ҳуқуқ, аҳли илм ва фарҳангу адаб, кормандони дигар соҳаҳоро низ ҷалб намудан зарур аст. Ба ин восита метавон дар зеҳни мардум афкори зиддикоррупсиониро ташаккул дод. Зеро муқовимат бо коррупсия, паст намудани сатҳу шиддати он, пеш аз ҳама, аз шуурнокӣ, ҳамдигарфаҳмӣ, савияи баланди маърифати ҳуқуқии зиддикоррупсионӣ, муборизаи фаъолона ва дастаҷамъонаи афроди ҷомеа бар зидди ин падидаи номатлуб вобастагии зич дорад».
Сарнозири Сарраёсати пешгирии коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Абдукарим Маҷидӣ ва нозири сарраёсати мазкур Фаромарз Раҳмонзода оид ба иҷрои тадбирҳои чорабиниҳои «Стратегияи муқовимат бо коррупсия дар Ҷумҳуриии Тоҷикистон барои солҳои 2013-2020» ва хавфҳои коррупсия, роҳу усулҳои пешгирии омилҳои коррупсионӣ, дарки амиқи зарару оқибатҳи ногувори он маълумот дода, масъалаҳои иҷрои бечунучарои талаботи қонунгузории зиддикоррупсионӣ ва дар амал татбиқ намудани онро ба ҳозирин шарҳ доданд.
Мақсади вохӯрӣ аз пешгирии пайомадҳои зуҳуроти номатлуби ҷомеаи имрӯза — амалҳои коррупсионӣ, суиистифода аз вазифа, гирифтани пора ва қабули қарори дорои хусусияти коррупсионӣ иборат буд.