«Душанбе маскани зебоӣ ва озодагист»-ҳамоиш бахшида ба Рӯзи байналмилалии муҳити зист

ДУШАНБЕ, 12.05.2017 /АМИТ «Ховар»/. Қарори Раиси шаҳри Душанбе Рустами Эмомалӣ аз 10 майи соли равон  «Дар бораи тасдиқи нақшаи чорабиниҳои Мақомоти иҷроияи ҳокимияти давлатии шаҳри Душанбе бахшида ба Рӯзи байналмилалии муҳити зист» ба тасвиб расид. Он бо мақсади иҷрои Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон  дар давраи то соли 2020, инчунин дар сатҳи баланд таҷлил намудани 45-умин солгарди Рӯзи байналмилалии муҳити зист нигаронида шудааст.

Тавре аз Раёсати иттилоот ва робитаҳои хориҷии дастгоҳи Раиси шаҳр хабар доданд, тибқи қарори мазкур  нақшаи чорабиниҳои Мақомоти иҷроияи ҳокимияти давлатии шаҳри Душанбе бахшида ба Рӯзи байналмилалии муҳити зист тасдиқ гардида,  5 июни соли 2017, соати 18:00 дар Муассисаи давлатии «Наврӯзгоҳ»-и шаҳри Душанбе барномаи фарҳангӣ-фароғатӣ таҳти унвони «Душанбе  маскани зебоӣ ва озодагист» баргузор карда мешавад.

Раиси шаҳр бо ин қарор  муовинони Раиси шаҳри  Душанбе, раиси ноҳияи Исмоили Сомонии пойтахтро вазифадор намуд, ки  барои дар сатҳи баланди фарҳангӣ доир намудани чорабинии зикргардида тадбирҳои амалӣ андешанд.