Шариф Назарзода: «Барои пешгирии ҷинояткорӣ ва решакан намудани зуҳуроти ба фарҳанги миллӣ бегона муборизаи дастаҷамъона барем»

ДУШАНБЕ, 01.05.2017. /АМИТ «Ховар»/. Дар «Қасри Арбоб»-и ноҳияи Бобоҷон Ғафурови вилояти Суғд дар доираи амалиёти пешгирӣ ва маърифатии «Маданияти шаҳрдорӣ» бо фаъолони ноҳия мулоқоти судманд баргузор гардид.
Тавре аз Вазорати корҳои дохилии Ҷумҳурии Тоҷикистон хабар доданд, дар мулоқот сардори РВКД дар вилояти Суғд генерал-майор Шариф Назарзода аз саҳми ҷавонон дар ҳаёти сиёсиву иҷтимоии Тоҷикистони соҳибистиқлол, дастгириҳои пайвастаи роҳбарияти Ҳукумати мамлакат ҳарф зад. Ӯ аз ҷумла, зикр намуд, ки «рушди бомароми соҳаҳои иқтисодиву иҷтимоии ноҳияи Бобоҷон Ғафуров ҳамасола боло рафта, садҳо муассисаҳои истеҳсолӣ, фарҳангиву фароғатӣ ва иҷтимоӣ, маданиву маишӣ ва таълимӣ, варзишӣ ва ҳифзи саломатӣ бунёд ва мавриди баҳрабардорӣ қарор дода мешаванд».
Шариф Назарзода аз иштирокдорони мулоқот даъват ба амал овард, то дар пешгирии ҷинояткорӣ ва решакан намудани зуҳуроти ба фарҳанги миллӣ бегона муборизаи дастаҷамъона баранд.
«Сокинони ноҳия иброз доштанд, ки дар доираи баргузории амалиёти пешгирикунандаи «Маданияти шаҳрдорӣ» фаъолона иштирок намуда, дар бартарафсозии мушкилоти ҷомеа ва кирдорҳои зиддиҳуқуқӣ саҳми назаррас мегузоранд»,-иттилоъ доданд аз Вазорат.