Таҷлили Соли ҷавонон ва Рӯзи ваҳдати миллии Тоҷикистон дар Амороти Муттаҳидаи Араб

ДУШАНБЕ, 23.05.2017. /АМИТ «Ховар»/. 19 майи соли равон бо ташаббуси Сафорати Ҷумҳурии Тоҷикистон дар Амороти Муттаҳидаи Араб ва Консулгарии генералӣ дар Дубай гиромидошти Соли ҷавонон ва 20-умин солгарди Рӯзи Ваҳдати миллӣ дар Аморати Дубай таҷлил гардид.

Тавре аз Сафорати Ҷумҳурии Тоҷикистон дар Амороти Муттаҳидаи Араб хабар доданд, дар ҳамоиш донишҷӯён, ҷавонон ва тоҷикони муқими АМА иштирок намуданд.

Сафири Тоҷикистон дар АМА Баходур Шарифӣ аҳамияти ин санаи тақдирсоз, яъне 27 июни соли 1997 ба имзо расидани Созишномаи умумии истиқрори сулҳ ва ризоияти миллиро бори дигар таъкид намуда, аз кӯшишҳо ва ҷоннисориҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри расидан ба сулҳу ваҳдати пойдор ёдовар шуд. Инчунин Сафир ҷавононро ба ватанпарастию ватандӯстӣ даъват намуда, ҳидоятҳои Сарвари давлатро дар бораи он, ки ба ҳар гуна гурӯҳу ҳаракатҳои ифротӣ ва тундгаро пайваст нашаванд ва ҳамеша барои ободии Ватани маҳбубамон саъю талош намоянд, таъкид намуд.

Барои гузаронидани ҳамоиш аз Тоҷикистон роҳбари ташкилоти ҷамъиятии «Армуғони сулҳ» шоираи ватансаро Хосият Вализода ва Ҳунарманди шоистаи Тоҷикистон сарояндаи маъруф Тобиш Ҳилолӣ даъват шуда буданд.

Дар ҳамоиш ба иштирокдорон филми мустанад дар бораи Ваҳдати миллӣ намоиш дода, сурудҳо дар васфи Ватан сароида шуданд.