Дар вилояти Хатлон семинарии омӯзишӣ ҷиҳати фаъолгардонии занон доир карда шуд

ҚӮРҒОНТЕППА, 20.07.2017 /АМИТ «Ховар»/. Раёсати кор бо занон  ва  оилаи Мақомоти иҷроияи  ҳокимияти давлатии  вилояти Хатлон   дар якҷоягӣ  бо  Кумитаи  кор бо  занон  ва оилаи  назди  Ҳукумати Ҷумҳурии  Тоҷикистон тасмим гирифтанд, ки дар  доираи  нақшачорабиниҳо оид  ба  амалигардонии Барномаи нави давлатии «Тартиб,  интихоб ва  ҷобаҷогузории кадрҳои  роҳбарикунандаи  Ҷумҳурии Тоҷикистон барои солҳои 2017-2022»  семинари омӯзишӣ  баргузор намояд.

Тавре аз Раёсати кор бо  занон  ва  оилаи  Мақомоти иҷроияи  ҳокимиятӣ  давлатии вилояти Хатлон иттилоъ  доданд,  мақсади  баргузор намудани  семинар фаъолгардонии  занон,  баланд  бардоштани маърифати сиёсиву –ҳуқуқӣ ва  малакаи  касбии  онҳо  мебошад.

Дар кори семинар намояндагони ташкилоту муассисаҳои вилоятӣ  ва  ҳамоҳангсозони   Барномаи  мазкур  иштирок  намуданд.  Сармутахассиси  Раёсати кор бо  занон  ва  оилаи  Мақомоти иҷроияи  ҳокимияти давлатии  вилояти Хатлон Сабзагул  Зокирова иттилоъ  дод, ки  чунин  семинарҳои омӯзишӣ бо  ҷалби занон  ва  духтарон  дар  дигар шаҳру  навоҳии  вилояти Хатлон  низ ба нақша гирифта шудааст.