«Оинаи таърих»- озмуни ҷумҳуриявии осорхонаҳо ҷамъбаст мегардад

ДУШАНБЕ, 29.07.2017. /АМИТ «Ховар»/  31 июли соли равон соати 16:00 дар Вазорати фарҳанги Ҷумҳурии Тоҷикистон маросими ҷамъбасти ботантанаи Озмуни ҷумҳуриявии осорхонаҳо таҳти унвони «Оинаи таърих» баргузор мегардад.

Озмуни мазкур бо ташаббуси Вазорати фарҳанг ва иштироки фаъолонаи осорхонаҳои давлатӣ ва ғайридавлатии Тоҷикистон дар ду давр доир гардид.

Тавре аз Вазорати фарҳанги ҷумҳурӣ иттилоъ доданд, мақсад аз баргузории озмун баланд бардоштани мақому манзалати осорхонаҳо дар ҷомеа, беҳтар намудани мундариҷа ва сифати фаъолияти онҳо дар шароити нави иҷтимоӣ-фарҳангӣ, ҷалб намудани таваҷҷуҳи аҳли ҷомеа ба мушкилоти соҳаи осорхонавӣ ва ба ин васила мусоидат ҷиҳати ободонӣ, таҳкими базаи моддӣ-техникӣ ва фароҳам овардани шароитҳои мусоид барои шаҳрвандон дар осорхонаҳо буда, ҳадафи асосии он такмили шаклу услубҳо ва ба талаботи замони истиқлол мутобиқ гардонидани фаъолияти осорхонаҳои мамлакат, шиносоии ҳарчи бештари шаҳрвандон ба мероси пурарзиши ниёгон мебошад.

Ғолибони даври ҷамъбастии Озмуни ҷумҳуриявии осорхонаҳо «Оинаи таърих» аз ҷониби Вазорати фарҳанг бо мукофотҳои пулӣ, туҳфаҳо, инчунин бо ифтихорномаҳо ва нишони сарисинагии «Аълочии фарҳанги Ҷумҳурии Тоҷикистон» ва Ифтихорномаи Вазорати фарҳанги Ҷумҳурии Тоҷикистон қадрдонӣ карда мешаванд.