Қонуни танзим манфиатҳои иҷтимоии мардуми кишварро ҳимоя мекунад

ХУҶАНД, 05.08.2017 /АМИТ «Ховар»/.  Соли равон аз қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» 10 сол сипарӣ гардид. Бояд гуфт, ки қонуни мазкур дар қонунгузории кишвар таҷрибаи нав буда, он дар доираи манфиатҳои мардум таҳия ва қабул гардидааст. Имрӯзҳо мардуми саросари кишвар моҳияти қонуни мазкурро дарк намуда, дар амалишавии он саҳмгузорӣ менамоянд.

Муҳсин Миркамолов, мудири бахш оид ба корҳои дин, танзими анъана ва ҷашну маросимҳои миллии Мақомоти иҷроияи ҳокимияти давлатии шаҳри Хуҷанд  роҷеъ ба хусусиятҳои риоя ва татбиқи талаботи қонуни мазкур ба хабарнигори АМИТ «Ховар» баён дошт, ки «анъана ва расму оинҳо аз ниёгонамон ба мо расида, риоя ва эҳтироми он қарзи  наслҳои имрӯзу баъдӣ низ ба ҳисоб меравад. Тавре шоҳидем, тайи чанд соли пеш аз ҳад зиёд сермасраф гузаронидани ҷашну маъракаҳо ба мардуми кишвар бори гарон меоварданд. Пас аз қабули қонуни мазкур хароҷоти сокинони Хуҷандшаҳр дар маъракаҳои тӯю дафнӣ давоми ин солҳо наздик ба 1,5 баробар кам гардид. Зимни суҳбату вохӯриҳо бо сокинони Хуҷандшаҳр аён мегардад, ки аҳолӣ аз қабули ин қонун пуштибонӣ мекунанд. Мисоли равшан он аст, ки шумораи баргузории тӯю маъракаҳо зиёд ва қонунвайронкунӣ аз ҷониби сокинон кам гардида истодааст».

Давоми шашмоҳаи аввали соли 2017 дар шаҳри Хуҷанд 933 адад маъракаҳо ба қайд гирифта шудаанд, ки аз онҳо 442 адад тӯи арӯсию домодӣ, 351 адад хатнасур, 98 адад маъракаи чил ва 46 адад маъракаи сол ба ҳисоб мераванд. Мардум имрӯз он маблағеро, ки аз маъракаҳои нолозим пасандоз кардаанд, баҳри ба таҳсил фаро гирифтани фарзандон, табобату истироҳати аҳли оила ва зарурати дигари рӯзгор масраф менамоянд.

Ҳамзамон дар ин самт камбудиҳо низ ҷой доранд. Аз ҷумла, дар шашмоҳаи аввали соли равон аз тарафи комиссияи доимии танзими анъана ва ҷашну маросимҳои миллии назди мақомоти маҳаллии шаҳрӣ дар раванди баргузории маъракаҳо 56 санҷиш гузаронида (2016-49),  8 ҳолати қонунвайронкунии баргузории маъракаҳо ба қайд гирифта шуд. Нисбат ба шахсони вайронкунандаи ҳуқуқ бинобар вайрон намудани талаботи қонун, аз ҷумла моддаҳои 10 ва 13, маводи ҳуқуқвайронкунии маъмурӣ тартиб дода шуда, ба суди шаҳрӣ ирсол карда шуданд.