«Локомотив»-и Тошканд «Истиқлол»-и Душанберо барои баромадан ба даври навбатии Ҷоми КФО табрик намуд

ДУШАНБЕ, 14.09.2017 /АМИТ «Ховар»/. Чемпиони феълии Ӯзбекистон — «Локомотив»-и Тошканд ба унвони чемпиони Тоҷикистон — дастаи «Истиқлол»-и Душанбе бинобар баромадан ба даври финалии байниминтақавии Ҷоми КФО-2017 номаи шодбошӣ ирсол намуд. Дар ин бора ба АМИТ «Ховар» аз Федератсияи футболи Тоҷикистон хабар доданд.

Дар номаи расмии муовини директори генералии дастаи футболи «Локомотив»-и Тошканд Тулабек Акрамов, ки ба унвонии президенти дастаи футболи «Истиқлол» Шоҳрух Саидзода ирсол шудааст, аз ҷумла, гуфта мешавад:

«Ҳайати дастаи касбии футболи «Локомотив»-и Тошканд – роҳбарият, ҳайати мураббиён, бозингарон ва ҳайати кормандон – дастаи шумо — «Истиқлол»-и Душанберо барои баромадан ба даври ½-финалии Ҷоми КФО шодбош мегӯянд. Барои шумо пешрафти пайваста, рушд ва ғолибиятҳои зиёдро ба манфиати футболи тоҷик орзумандем».

Ёдовар мешавем, ки дар даври финалии байниминтақавии Ҷоми КФО-2017 дастаи «Истиқлол»-и Душанбе бо «Бенгалуру»-и Ҳиндустон вохӯрӣ анҷом медиҳад. Вохӯрии аввал 27 сентябр дар Варзишгоҳи марказии Ҳисор баргузор гардида, соати 19:00 ба вақти Душанбе оғоз мешавад. Вохӯрии ҷавобӣ 18 октябр дар шаҳри Бангалори Ҳиндустон доир мегардад. Ғолиби ин вохӯрӣ дар бозии финалии Ҷоми КФО, ки 4 ноябр баргузор мешавад, бо ғолиби ҷуфти «Ал-Ваҳда»-и Сурия ва «Эйр Форс»-и Ироқ вориди майдон хоҳад шуд.