Зӯроварӣ дар оила кирдори зиддиҳуқуқии бадқасдона мебошад –бардошт аз ҳамоиш дар Душанбе
![](https://khovar.tj/wp-content/uploads/2017/10/DSC_0185-1.jpg)
ДУШАНБЕ, 10.10.2017 /АМИТ «Ховар»/. Имрӯз дар Муассисаи давлатии «Душанбе Плаза» бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Филиали ГОПА дар Ҷумҳурии Тоҷикистон дар мавзӯи «Пешгирии хушунату зӯроварӣ дар оила-асоси пойдории оилаҳои ҷавон дар ҷомеа» ҳамоиши муштарак баргузор гардид, ки дар он 70 нафар ҷавонони ҷумҳурӣ иштирок доштанд.
Тавре хабарнигори АМИТ «Ховар» аз ҷараёни ҳамоиш хабар дод, дар он ҳамчунин намояндагони вазорату идораҳо, мудирони бахшҳои кор бо ҷавонон ва варзиши шаҳру ноҳияҳои ҷумҳурӣ ширкат намуданд.
Муовиини директори Институти фалсафа, сиёсатшиносӣ ва ҳуқуқи ба номи Баҳоваддинов Муҳиба Маҳмадҷонова дар мавзӯи «Хушунати хонаводагӣ сабаби пошхӯрии оилаҳои ҷавон» иброз дошт, ки дар Ҷумҳурии Тоҷикистон дар қатори дигар кишварҳо ба масъалаҳои муносибат, алалхусус муносибати хуб ё бад дар оила аҳамияти хеле зиёд дода мешавад. «Ин мавзӯъ яке аз масъалаҳои мубрамтарини омӯзиши ҷомеа дар Тоҷикистон ба ҳисоб меравад. Олимони Тоҷикистон, бахусус ҷомеашиносон дар солҳои истиқлолият доир ба ин мавзӯъ корҳои номзадӣ ва тадқиқот анҷом додаанд, ки вижагиҳои масъалаи оила ва иштироки ҷавононро дар оила ва оиладорӣ баррасӣ намудаанд. Дар ин кор махсусан саҳми ҷомеашиносӣ ва сиёсатшиносӣ назаррас аст. Масъалаҳое, ки дар мавриди ҳуқуқи оиладорӣ дар байни қонуншиносони мо матраҳ мегарданд, мубрамияти масъала ва яке аз масъалаҳои муҳими ҷомеаи мо буданашро нишон медиҳанд».
Ба гуфтаи Муҳиба Маҳмадҷонова, ин масъала дар маркази ҳаракатҳои тадқиқоти занона қарор дорад, ки аз соли 1996 инҷониб дар Ҷумҳурии Тоҷикистон бо кӯшишу ҳаракати олимони ҷомеашинос, бахусус занҳои олимаи Ҷумҳурии Тоҷикистон татбиқ карда шуда, натиҷаҳои назаррас дорад. «Бояд гуфт, ки дар ин соҳа низ масъалагузорӣ дар байни ҷомеа ба таври васеъ ба роҳ монда шуда буд ва мо имрӯз метавонем бигӯем, ки чигунагии вазъияти оиларо дар кишвар мо метавонем ба таври илмӣ баррасӣ намоем. Мо имрӯз ҳамчун як дастоварди илми гендер дар Тоҷикистон метавонем гӯем, ки олимони тоҷик ва ҷомеашиносон тавонистанд бо таҳқиқоти вижаи худ дар ин соҳа таълимоти гендериро пурра намоянд ва ба таълимоти гендершиносӣ мафҳуми возеҳеро ворид намуданд, ки он гендершиносии ҷомеаҳои анъанавӣ ном дорад»,-зикр намуд ӯ.
Дар идома аз ҷониби иштирокчиён зикр карда шуд, ки зӯроварӣ дар оила кирдори зиддиҳуқуқии бадқасдона мебошад, ки аз ҷониби як узви оила нисбат ба узви дигари он содир шуда, боиси поймол шудани ҳуқуқ ва озодиҳои ӯ, расонидани дарди ҷисмонӣ ва зарар ба саломатии ӯ мегардад. Моро мебояд нисбат ба он бетафовут набошем.
Шаҳлои САДРИДДИН