Дар Суғд ҷаласаи муштараки Кумитаи ҳолатҳои фавқулода ва мудофиаи граждании Тоҷикистон ва Вазорати ҳолатҳои фавқулодаи Қирғизистон доир шуд

ДУШАНБЕ, 11.11.2017 /АМИТ «Ховар»/. Дар шаҳри Гулистони вилояти Суғд дуюмин ҷаласаи муштараки мушовараи  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Вазорати ҳолатҳои фавқулодаи Ҷумҳурии Қирғизистон баргузор шуд.

Тавре аз Кумитаи ҳолатҳои фавқулода ва мудофиаи гражданӣ ба АМИТ «Ховар» хабар доданд, дар кори ҷаласа ҳайати Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон  ва Вазорати ҳолатҳои фавқулодаи Ҷумҳурии Қирғизистон,  ҳамчунин роҳбарони намояндагиҳои як зумра  созмонҳои байналмилалӣ, ки дар самти коҳиши хатари офатҳои табиӣ фаъолият мекунанд, ширкат намуданд.

«Ҷумҳурии Тоҷикистон ва Қирғизистон чун ду кишвари ҳаммарз ва дорои иқлими ягона аз қадим дар самти ҳолатҳои фавқулода, пешгирӣ ва коҳиш додани хатари офатҳои табиӣ ҳамкорӣ доранд.  Қирғизистон низ чун Тоҷикистон дар минтақаи осебпазири офатҳои табиӣ ҷойгир шудааст ва ҳамасола бар асари офати табиӣ ва техногении гуногун ин кишвар миллионҳо сомонӣ зарар мебинад», — хабар дод манбаъ.