Номзадҳо ба вакили Маҷлиси вакилони халқи ноҳияи Исмоили Сомонии шаҳри Душанбе аз ҳавзаи интихоботии №19 барномаҳои номзадии худро муаррифӣ намуданд

ДУШАНБЕ, 11.11.2017 /АМИТ «Ховар»/.  Дирӯз дар литсейи №1-и хонандагони болаёқати шаҳри Душанбе вохӯрии номзадҳо ба вакили Маҷлиси вакилони халқи ноҳияи Исмоили Сомонии шаҳри Душанбе аз ҳавзаи интихоботии №19  бо донишҷӯён баргузор гардид.

Зимни вохӯрӣ номзадҳо ба вакили Маҷлиси вакилони халқи ноҳияи Исмоили Сомонии шаҳр Душанбе аз ҳавзаи интихоботии №19 —  раиси Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ Насимҷон Расулзода ва номзади худпешбар, машваратчии таълимӣ бо омӯзгорон ва донишҷӯёни факултаи филологияи рус дар Донишгоҳи славянии Россияву Тоҷикистон Аслам Шарипов  худро ба донишҷӯён муаррифӣ намуда, барномаҳои пешазинтихоботии худро ба онҳо шинос намуданд.

Барномаҳои пешазинтихоботии номзадҳо аз бахшҳои сиёсӣ, иқтисодӣ, иҷтимоӣ, фарҳанг, татбиқи сиёсати ҷавонон, варзиш ва сайёҳӣ иборат буда, масъалаҳои  мусоидат намудан  ба амалӣ гардидани сиёсати пешгирифтаи Президенти Ҷумҳурии Тоҷикистон дар бунёди ҷомеаи озод ва шаҳрвандӣ, саҳмгузорӣ дар пешрафту  ташаккули соҳаи иҷтимоии ҷомеа, махсусан ба итмом расонидани ислоҳоти мактабу маориф бо назардошти арзишҳои умумибашарӣ дар асоси урфу одат, расму оин, ахлоқу одоби миллӣ ва паст намудани сатҳи камбзоатии сокинони маҳалро дар бар мегирифт.

Дар охир номзадҳо ба вакили Маҷлиси вакилони халқи ноҳияи Исмоили Сомонии шаҳри Душанбе аз ҳавзаи интихоботии №19  бо донишҷӯён суҳбат намуда, аз мушкилоти онҳо огоҳӣ пайдо карданд.