Фаъолияти 5 гурӯҳи муташаккили ҷиноятпешаи фаромиллӣ қатъ карда шуд

ДУШАНБЕ, 24.01.2018 /АМИТ «Ховар»/. Соли 2017 кормандони Агентии назорати маводи нашъаовари назди Президенти Ҷумҳурии Тоҷикистон (АНМН) фаъолияти 52 (с.2016-48)  гурӯҳи ҷинояткорро дар ҳайати 115 нафар ошкор ва қатъ гардониданд, ки 5-тои онҳо гурӯҳҳои муташаккили ҷиноятпешаи фаромиллӣ мебошанд. Дар ин бора имрӯз зимни нишасти матбуотӣ муовини директори Агентӣ Муртазо Ҳайдарзода ба хабарнигорон гузориш дод.

Зимни гузориш зикр гардид, ки дар ин давра дар ҷумҳурӣ аз ҷониби мақомоти ҳифзи ҳуқуқ ва сохторҳои низомии мамлакат фаъолияти 7 гурӯҳи муташаккили ҷиноятпеша (с.2016 – 4) ошкор ва қатъ гардонида шудааст, ки нисбат ба ҳамин давраи соли гузашта 3 ҳолат ё 75 фоиз зиёд мебошад. Аз ин шумора фаъолияти 5 гурӯҳи муташаккили ҷиноятӣ танҳо аз ҷониби АНМН ошкор ва қатъ гардонида шудааст.

«Ҳоло он, ки дар солҳои 2012-2014 аз ҷониби мақомоти мазкур ҳар сол ҳамагӣ 2 ё 3 гурӯҳи муташаккили ҷиноятпеша ошкор мегардиду халос»,-гуфт номбурда.

Муртазо Ҳайдарзода ҳамзамон иттилоъ дод, ки дар самти ошкор ва дастгир намудани шахсони дар кофтукови байнидавлатӣ  қарордошта тадбирҳои зарурӣ андешида шуда, 13 нафари онҳо дастгир ва ба ҷавобгарии ҷиноятӣ кашида шуданд.