«НУҲ НОТАИ СЕҲРОФАР». Ҷаннати 12-сола дар котиботи СҲШ дар Пекин барномаи консертӣ пешниҳод кард

ДУШАНБЕ, 3. 01.2018  /АМИТ «Ховар»/. Чанде қабл дар қароргоҳи Созмони ҳамкории Шанхай дар шаҳри Пекин консерти камеравии донишҷӯи Коллеҷи санъати ба номи А. Бобоқулови шаҳри Душанбе Ҷаннат Ҳусейнзодаи 12-сола баргузор гардид.

Тавре дар ин бора ба мухбири АМИТ  «Ховар» аз маркази матбуоти Вазорати фарҳанги Ҷумҳурии Тоҷикистон иттилоъ доданд, консерти мазкур дар доираи силсилаи «Нуҳ нотаи сеҳрофар» бо ибтикори Котиботи СҲШ ва Сафорати Ҷумҳурии Тоҷикистон дар Ҷумҳурии Мардумии Чин гузаронида шуд.

Қобили зикр аст, ки Котиботи генералии СҲШ бо мактуби расмӣ  ҷиҳати даъвати Ҷаннат Ҳусейнзода ва баргузори консерти камеравии ӯ ба Ҳукумати Ҷумҳурии Тоҷикистон ва Вазорати фарҳанги Ҷумҳурии Тоҷикистон муроҷиат карда буд.

Котиби генералии CҲШ Рашид Олимов ба барномаи консертӣ ҳусни ифтитоҳ бахшида, иброз дошт, ки мусиқӣ- ин забони муоширати байни миллатҳо мебошад ва ба тарҷума ниёз надорад.
Сафири Фавқулода ва Мухтори Ҷумҳурии Тоҷикистон дар Ҷумҳурии Мардумии Чин Парвиз Давлатзода Ҷаннатро самимона ба Пекин хайрамақдам гуфта, дар бораи маҳорати нодири пианинонавози наврас нақл кард. «Мухлисони Ҷаннат ӯро барои иҷрои беҳамтои мусиқии композиторони машҳур, мисли Бах, Чайковский ва Бетховен, инчунин барои асарҳое, ки худи Ҷаннат эҷод кардааст, дӯст медоранд»,- иброз дошт сафир.

Барномаи консертӣ, ки Ҷаннат Ҳусейнзода ҳамроҳ бо устодаш онро махсус омода карда буданд, асарҳои В.А.Мотсарт, Ф.Менделсон, Я.Сибелиус, Ф.Шопен, Готтшалк ва чанд асари лирикии композиторони муосири чиниро дарбар мегирифт. Мусиқии худи Ҷаннат таҳти унвони «Баҳор» ба барномаи консертӣ ҳусни нав зам намуд.
Дар доираи барнома инчунин намоиши аккосӣ таҳти унвони «Таърихи маданияти мусиқии халқи тоҷик» ба маъраз гузошта шуд. Меҳмонони барнома тавонистанд, ки расмҳои ёдгориҳои нодир, аз қабили бонуи уднавоз — бозёфти асрҳои VI-VII мелодӣ дар Панҷакенти қадим, ҳайкалчаи асримиёнагии бонуи дафнавоз, ки дар вохӯрии Шоҳи Сосониён Хусрав ва дӯстдоштаи ӯ Ширин иштирок дошт, саҳнаи вохӯрии Шоҳ Хусрави Парвиз ва Борбад ва ғайраҳоро тамошо кунанд.
Дар намоишгоҳ инчунин зиндагиномаи санъаткорони барҷаста ва композиторон, арбобони шоистаи санъати тоҷик, мисли Зиёдулло Шаҳидӣ, Аъзам Камолов, Шоҳназар Соҳибов, Ҳанифа Мавлонова, Зафар Нозимов, Одина Ҳошимов, Фирӯз Баҳор, Дамир Дӯстмуҳаммедов, Талабхӯҷа Сатторов, Шарофиддин Сайфиддинов, Толибхон Шаҳидӣ ва дигарон ҷой дода шуда буданд.
Хотиррасон менамоем, ки  Ҷаннат Ҳусейнзода донишҷӯи курси якуми шуъба ва ихтисоси «Фортепиано»- и Муассисаи давлатии «Коллеҷи санъати ш. Душанбе ба номи А.Бобоқулов» мебошад ва аз панҷсолагӣ ба омӯзиши мусиқӣ машғул аст. Ӯ дар навохтани пианино ва скрипка маҳорати хос дошта, қобилияти дирижерӣ ва эҷоди асарҳои мусиқиро низ дорад.

Ҷаннат иштирокчии чандин озмун ва ҷашнвораҳои байналмилалӣ дар кишварҳои гуногун, аз қабили Ӯзбекистон, Миср, Франсия, лауреат ва барандаи медали тиллоии «The Golden Festival Interna tional» (Париж,моҳи маи 2015) мебошад.