БОРИ АВВАЛ ДАР ДУШАНБЕ! Таҳти сарпарастии Президенти Федератсияи футболи Тоҷикистон Рустами Эмомалӣ Фестивали “Наврўз-мероси фарҳангии сайёҳӣ” баргузор мешавад

ДУШАНБЕ, 23.02.2018 /АМИТ «Ховар»/.Таҳти сарпарастии Президенти Федератсияи футболи Тоҷикистон  Рустами Эмомалӣ   22 марти соли 2018 дар шаҳри Душанбе тибқи Нақшаи чорабиниҳои “Соли рушди сайёҳӣ ва ҳунарҳои мардумӣ”, ки аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тасдиқ гардидааст, Фестивали “Наврўз —  мероси фарҳангии сайёҳӣ” баргузор мегардад. Ин фестивал бори аввал роҳандозӣ карда мешавад. Дар ин бора ба АМИТ «Ховар» Раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода хабар дод.

Дар фестивали мазкур ҷашни байналмилалии Наврўз ҳамчун симои (бренди) сайёҳии Тоҷикистон ба доираи васеи сайёҳон, ки дар арафаи Наврўз ба Тоҷикистон ташриф меоранд, муаррифӣ карда шуда, ширкатҳои сайёҳии ватанӣ имкониятҳои сайёҳии кишвар,   ҳунармандони ҷумҳурӣ бошанд маҳсули ҳунарҳои дастии худро ба маърази тамошо мегузоранд ва барномаи фароғатӣ-сайёҳӣ ташкил карда мешавад. Қарор аст ин тадобир минбаъд ба ҳукми анъана дароварда,  ба   усули  доимии ҷалби сайёҳони хориҷӣ табдил дода шавад.

Бояд зикр намуд,  ки барои муаррифии Наврўзи байналмилалӣ ҳамчун бренди миллии сайёҳӣ корҳои муайян анҷом дода шуда, дар назар аст, ки имсол гуруҳҳои сайёҳон барои  ширкат дар  таҷлили  Иди байналмилалии Наврӯз   ба ҷумҳурии мо сафар мекунанд.

Ҷашни Наврӯз, ки аз қадимтарин идҳои тоҷикон маҳсуб меёбад, бо хусусиятҳои хоси худ яке аз афзалиятҳои муҳими Тоҷикистон барои ҷалби таваҷҷуҳи чомеаи ҷаҳонӣ ба мероси бойи таърихию фарҳангии миллати тамаддунофари халқи тоҷик мебошад.

Аз сӯи дигар Наврӯз ҳамчун омили таҳкими ҳуввияти миллӣ ва бедор кардани ҳиси ифтихори ватандорӣ дар ниҳоди мардум ва дар сатҳи ҷаҳонӣ муаррифӣ шудани симои мамлакат ҳамчун кишвари дорои тамаддуни қадима ва захираҳои бузурги сайёҳидошта мусоидат менамояд.