Дар Боку бахшида ба раёсати Ҷумҳурии Тоҷикистон дар ИДМ дар соли 2018 ҳамоиш баргузор гардид

ДУШАНБЕ, 14.02.2018 /АМИТ «Ховар»/. Бо ибтикори Сафорати Ҷумҳурии Тоҷикистон дар Ҷумҳурии Озарбойҷон ва дастгирии Кумита оид ба умури байналмилалӣ ва алоқаҳои байнипарлумонии Миллӣ Маҷлиси Ҷумҳурии Озарбойҷон ва гурӯҳи дӯстии байнипарлумонии Озарбойҷону Тоҷикистон 12 феврал дар Маркази сиёсии психологӣ ҳамоиши махсус бахшида ба раёсати Ҷумҳурии Тоҷикистон дар Иттиҳоди Давлатҳои Мустақил дар соли 2018 баргузор гардид. Дар ин бора аз Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд.

Дар ҳошияи нишаст дар Маркази мазкур гӯшаи Тоҷикистон ифтитоҳ гардид, ки дар он китобҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, асарҳои илмӣ-таърихӣ бахшида ба фаъолияти пурсамари Президенти Ҷумҳурии Тоҷикистон, инчунин китобҳо дар бораи дастовардҳои ҷумҳурӣ дар солҳои истиқлолият, таърих ва фарҳанги Тоҷикистон гузошта шуданд.