Фурӯшандаи дорувориҳои гуманитарии марбут ба бемориҳои сил ба ҷавобгарӣ кашида мешавад

ДУШАНБЕ, 10.02.2018. /АМИТ «Ховар»/. Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти мудири анбори Маркази вилоятии ҳимояи аҳолӣ аз бемориҳои сил дар минтақаи Кӯлоби вилояти Хатлон Назар Раҷабов хабар медиҳад.
Бино ба иттилои манбаъ, Назар Раҷабов ба фурӯши дорувориҳои гуманитарии марбут ба бемориҳои сил, ки аз барномаи хориҷии НОРЕ ба Ҷумҳурии Тоҷикистон ворид гардидаанд, машғул шуда, аз шаҳрванд «А» барои дастрас намудани ин навъи доруворӣ, ки бояд ройгон дода мешуд, 5000 сомонӣ талаб намудааст.
Дар натиҷаи гузаронидани корҳои фаврӣ-тафтишотӣ Назар Раҷабов зимни ба шаҳрванд «А» фурӯхтани дорувории зикргардида дастгир шуда, маблағи 5000 сомонӣ аз ӯ ҳамчун далели шайъӣ ёфта гирифта шуд.
«Вобаста ба ҳолати мазкур нисбат ба Назар Раҷабов бо моддаи 257 қисми 2 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишоти пешакии он идома дорад»,-илова намуд манбаъ.