Меҳринигори Рустам дар Озмуни баналмилалии таронаву оҳанги «Rising Star»-и Ҳиндустон ширкат намуд

Февраль 7, 2018 16:20

ДУШАНБЕ, 07.02.2018 /АМИТ «Ховар»/.  Сарояндаи  ҷавону шинохтаи тоҷик Меҳринигори Рустам дар Ҷумҳурии Ҳиндустон бо таронаи машҳури «Хатуба” аз филми ҳиндии «Алибобо ва 40 роҳзан” ҳунарнамоӣ карда, ба даври сеюми озмуни таронаву оҳанги «Rising Star” роҳ ёфт. Ҳунарнамоии Меҳринигорро тавассути шабакаи телевизионии «Colors TV”-и Ҳиндустон даҳҳо миллион нафар тамошо карданд. Дар ин бора модари Меҳринигор Адибаи Рустам аз Ҷумҳурии Ҳиндустон ба мухбири  АМИТ “Ховар ” хабар дод.

Ба иттилои модари сароянда, ҳунарнамоии Меҳринигор дар озмуни «Rising Star” — сабқати овозхонҳои ҷавони Ҳиндустон ҳам ҳайати ҳакамон ва ҳам тамошобинони ҳиндиро ба ваҷд овард.

Қобили зикр аст, ки Меҳринигор аллакай аз ду даври озмун гузашт ва ба даври навбатӣ омодагӣ мебинад. Мавриди зикр аст, ки  «Rising Star” як сабқати байналмилалии мусиқист, ки имсол  мавсими дуюми он гузаронида шуд. Ин сабқат, ки  дар Ҳиндустон асосан дар байни овозхонҳои ҳиндӣ гузаронида мешавад,  бори аввал моҳи феврали соли 2017  доир гардида буд.

Меҳринигори Рустам  14 октябри соли 1994 ба дунё омада, дар Мактаби мусиқии ба номи Малика Собирова ва Консерваторияи миллии Тоҷикистон нозукиҳои мусиқиро омӯхтааст ва узви ансамбли эстрадии “Ориё”-и Кумитаи телевизион ва радиои назди Ҳукумати Ҷумҳурии Тоҷикистон мебошад. Меҳринигор соли 2003, вақте ҳамагӣ 9 сол дошт, Шоҳҷоизаи озмуни ҷумҳуриявии «Чӯҷаи заррин”-ро ба даст оварда буд.  Ӯ соли 2005  барандаи ҷашнвораи таронаҳои мардумӣ дар шаҳри Кӯлоб ва соли 2006 соҳиби ҷои аввал ва медали тиллои Бозиҳои Делфӣ дар Алма-Ато шуд. Меҳринигори Рустам соли 2007, дар 13-солагиаш аллакай ду  албоми  аввали таронаҳояшро бо номҳои «Тоҷикистон” ва «Шодиёна” нашр кард.

Февраль 7, 2018 16:20

Хабарҳои дигари ин бахш

Дар шаҳри Бохтар аз ҷониби Ҳизби Халқии Демократии Тоҷикистон 933 чорабинӣ доир карда шуд
Дар Тоҷикистон беш аз 45 миллион адад дору ва молҳои тиббӣ истеҳсол гардидаанд
Имрӯз дар Тоҷикистон ҳавои тағйирёбанда дар назар аст
28 июл дар якчанд вазорату идораҳо оид ба ҷамъбасти шашмоҳаи якуми соли 2025 нишасти матбуотӣ баргузор мегардад
НИШАСТИ МАТБУОТӢ. Дар Тоҷикистон дар беш аз 526 ҳазор метри мураббаъ хонаҳои истиқоматӣ ба истифода дода шудаанд
Байни Маркази тадқиқоти стратегии назди Президенти Ҷумҳурии Тоҷикистон ва Институти миллии тадқиқоти амниятии Муғулистон Ёддошти тафоҳум ба имзо расид
Имрӯз дар Тоҷикистон ҳарорат ба 38 дараҷа мерасад
Имрӯз дар якчанд вазорату идораҳо нишастҳои матбуотӣ баргузор мегарданд
Тоҷикистон мубодилаи почтаро бо Русия барқарор намуд
Сокинони деҳаҳои Ҷамоати деҳоти Навободи шаҳри Турсунзода бо оби тозаи нӯшокӣ таъмин гардиданд
Барои кормандони мақомоти молияи минтақаи Рашт машварати омӯзишӣ гузаронида шуд
25 июл дар якчанд вазорату идораҳо нишастҳои матбуотӣ баргузор мегарданд