МУЖДАИ НАВРӮЗ МЕРАСАД! Бахшида ба ин ҷашн дар «Наврӯзгоҳ» -и Душанбе барномаи театрӣ баргузор мегардад
![](https://khovar.tj/wp-content/uploads/2018/02/DSC_0060.jpg)
ДУШАНБЕ, 27.02.2018 /АМИТ «Ховар»/. Тавре қаблан хабар дода будем, дар пойтахт тибқи нақшаи мақомоти иҷроияи ҳокимияти давлатии шаҳри Душанбе корҳои омодагӣ ба таҷлили Иди байналмилалии Наврӯз оғоз гардидаанд.
Аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, 21 март бахшида ба Иди Наврӯз дар чор ноҳияи пойтахт баргузории барномаҳои фарҳангию фароғатӣ ва сайру гашти оммавӣ дар назар дошта шудааст. Ин базмҳои идона дар «Боғи фарҳангию фароғатии ба номи С.Айнӣ»-и ноҳияи Исмоили Сомонӣ, «Майдони 800-солагии Москва»-и ноҳияи Шоҳмансур, Боғи ба номи Мироненкои ноҳияи Сино ва Боғи фарҳангию фароғатии «Дӯстии халқҳо»-и ноҳияи Фирдавсӣ доир мегарданд.
25 март дар Муассисаи давлатии «Наврӯзгоҳ» -и шаҳри Душанбе барномаи театрӣ бахшида ба Иди байналмилалии Наврӯз баргузор мегардад.
Маврид ба зикр аст, ки аз 21 то 25 март дар ҳамаи ҷашнгоҳҳои пойтахт намоиши ҳунарҳои мардумӣ дар назар дошта шудааст.
Ҳамчунин 23 март дар КВД «Варзишгоҳи марказӣ» мусобиқаи гӯштини миллӣ ва 24 март дар МД «Наврӯзгоҳ»-и шаҳри Душанбе пойга (аспдавонӣ) доир мешаванд.
Хотиррасон менамоем, ки дар ин рӯзҳо дар пойтахти мамлакат бо мақсади дар сатҳи баланд таҷлил намудани ин ҷашни миллӣ корҳои ободонию хуррамгардонии кӯчаву хиёбонҳо, шаҳраку маҳаллаҳо, боғҳои фарҳангию фароғатӣ ва гулгаштҳо бо суръат идома дошта, дар ин макон ба миқдори зиёд дарахтони ороишиву сояафкан ва гулҳо шинонида шуданд.